ព្រឹត្ដិការណ៍ ខែ មករា-កុម្ភ ២០០៧


ថ្ងៃសៅរ៍ ទី 2.កក្កដា 2022.ម៉ោង 7:46

ថ្ងៃ ទី២ មករា តំនាង​មក​ពី​គណ​បក្ស​ប្រឆាំង​សម​រង្សី​ គឺ​លោក​កែវ រ៉េមី បាន​ស្នើ​សុំ​អោយ​បង្កើត​ច្បាប់​ការ​ពារ​ប្រមុខ​រដ្ឋា​ភិបាល​ បន្ទាប់​ពី​អតីត​​មេ​ដឹក​នាំ​ប្រទេស​អៀ​រ៉ាក់​ត្រូវ​គេ​កាត់​ទោស និង សំលាប់​ដោយ​ព្យួរ​ក​កាល​ចុង​ឆ្នាំ​នេះ​មក​ លោក​កែវ​រ៉េ​មី​ និយាយ​ថា ការ​ធ្វើ​ជា​មេ​ដឹក​នាំ​យូរ​រមែង​តែង​តែ​មាន​កំហុស​ដោយ​ចៀស​មិន​រួច​។

ថ្ងៃទីទី ៣ មករា លោក​ជីកេង ប្រធាន​តុលា​ក្រុង​ភ្នំ​ពេញ បាន​កាត់​ក្ដី​ អោយ​ទ្រង់​រណ​រិទ្ធ​ចាញ់​ក្ដី​លើ​ប្ដឹង​​មួយ​ចំនួន​ដែល​ព្រះ​អង្គ​ដាក់​ប្ដឹង​គណ​បក្សហ្វុនស៊ីនប៉ិច។

ថ្ងៃទី ៥មករា ទ្រង់​រណរិទ្ធ​ មិន​បាន​ចូល​ខ្លួន​ទៅ​បំភ្លឺ​នៅ​តុលា​ការ​តាម​ដិការ​តុលា​ការ​កោះ​អញ្ជើញ​ខ្លួន​នោះ​ទេ​ សូម​បញ្ជាក់​ថា​ទ្រង់​រណ​រិទ្ធ​ត្រូវ លោក​ញឹក ​ប៊ុនឆៃ អគ្គ​លេខា​ធិការ​គណ​បក្ស​ហ្វុនស៊ីនប៉ិច​ប្ដឹង​ថា​ បាន​លក់​ទី​ស្នាក់​ការ​គណ​បក្ស​ដោយ​ចិត្ដ​អែង ហើយ​ក្រៅ​ពី​នេះ​នៅ​មាន​បណ្ដឹង ពី​បទ​សហាយ​ស្មន់​ទៀត​ផង​។ មាន​ពាក្យ​ចចាម​អារាម​ថា​ ទ្រង់​រណ​រិទ្ធ​កំពុង​ស្វែង​រក​សិទ្ធិ​ជ្រោក​កោន​នយោ​បាយ​តាម​ស្ថាន​ទូត​ធំ​ៗ​នានា​ ដូច​ជា​ស្ថាន​ទូត​អា​មេរិក​ ស្ថាន​ទូត​អាល្លឺ​ម៉ង់​ កាណា​ដា​ជា​ដើម​។​

ថ្ងៃ ទី៧មករា គណ​បក្ស​ប្រជា​ជន​កម្ពុ​ជា​បាន​ប្រារព្ធ​ទិវា​ជ័យ​ជំនះ​៧​មករា លើ​របប​ប៉ុល​ពត​។ នៅ​ក្នុង​អោកាស​នោះ​គណ​បក្ស​ប្រជា​ជន​កម្ពុជា​ រៀប​ចំ​មីទីញ​ដ៏​ធំ​មួយ​នៅ​ទី​ស្នាក់​ការ​ធំ​របស់​ខ្លួន​នៅ​ទី​ក្រុង​ភ្នំពេញ​។ នេះ​គឺ​ជា​ខួប​អប​អរ​ អនុស្សាវ​រីយ៍​លើក​ទី​២៨​ហើយ​ ដែល​របប​ប៉ុល​ពត​ត្រូវ​បាន​ផ្ទួល​រំលំ។ ប៉ុន្តែ​គណ​បក្ស​ដ៏​ទៃ​ទៀត​មិន​បាន​ រៀប​ចំ​​​ប្រារព្ធ​ទិ​វា​៧​មករា​នេះ​ទេ​ ហើយ​មាន​ទស្សនៈ​ផ្សេង​ៗ​គ្នា​អំពី​អត្ថន័យ​ថ្ងៃ​៧មករា​នេះ​។

ថ្ងៃទី ៨មករា លោក​ហ៊ុន សែន​ប្រកាស​ថា​ លោក​មិន​ចូល​វិវត្ដ​ទេ​ ហើយ​លោក​ នឹង នៅ​កាន់​អំនាច​រហូត​ដល់​អាយុ​ ៩០​ឆ្នាំ​បើ​ប្រ​ជា​ពល​រដ្ឋ​នៅ​តែ​បោះ​ឆ្នោត​អោយ​លោក​។​

ថ្ងៃទី ៩ លោក​ម៉ម ប៊ុន​នាង​ មន្រ្ដី​ជិត​ស្និត​បំផុត​របស់​ទ្រង់​រណ​រិទ្ធ​ លោក​ជា​អ្នក​ធ្លាប់​ជួយ​អុបត្ថម​ថវិ​ការ​យ៉ាង​សំខាន់​មួយ​រូប​ ហើយ​បាន​គាំ​ទ្រ​គបក្ស​រណ​រិទ្ធ​ដែល​ទើប​បង្កើត​ថ្មី​ បាន​លា​ចាក​ចោល​ព្រះ​អង្គ​ហើយ​នៅ​ថ្ងៃ​នេះ​ លោក​ម៉ម​ ប៊ុន​ ដែល​ចូល​ទៅ​គាំ​ទ្រ​គណ​បក្ស​ហ្វុន​ស៊ីន​ប៉ិច​វិញ​ ត្រូវ​បាន​តែង​តាំង​ដោយ​រាជ​ក្រិត្យ​ ចុះ​ហត្ថ​លេខា​ប្រ​ថាប់​ត្រា​ ដោយ​លោក​ ជា​ ស៊ីម​ប្រ​មុខ​រដ្ឋ​ស្ដី​ទី​ តំនាង​ព្រះ​មហា​ក្សត្រ​ ជា​ទី​ប្រឹក្សា​អម​រដ្ឋា​ភិបាល​ ដែល​មាន​ឋានៈ​ស្មើ​ នឹង រដ្ន​មន្រ្ដី​។

ថ្ងៃទី ​១២ មករា លោក​ហ៊ុន សែន​ចាក​ចេញ​ពី​កម្ពុជា​ទៅ​កាន់​ប្រទេស​ហ្វីលី​ពីន​ ដើម្បី​ចូល​រួម​កិច្ច​ប្រជុំ​កំពូល​អាស៊ាន​លើក​ទី​១២​ និង កិច្ច​ប្រជុំ​នានា​ទៀត​ជា​មួយ​មេ​ដឹក​នាំ​ប្រ​ទេស​ធំ​ៗ​មួយ​ចំនួន​ក្នុង​តំបន់​អាស៊ី​។​

ថ្ងៃទី ១៦ មករា គណ​បក្ស​ចំនួន​ ៦ ​ដែល​ចូល​រួម​បោះ​ឆ្នោត​ឃុំ​សង្កាត់​បាន​នាំ​គ្នា​ទៅ​ចាប់​លេខ​រៀង​ ដើម្បី​ចូល​រួម​បោះ​ឆ្នោត​នៅ​ថ្ងៃ​១​មេសា​ខាង​មុខ​។​

ថ្ងៃទី ១៧ មករា តុលា​ខេត្ដ​បាត់​ដំបង​បាន​ចាប់​អុត្ដ​សនី​ ៣​រូប​ មក​ពី​គណ​បក្ស​ប្រឆាំង​ និង គណ​បក្ស​ហ្វុន​ស៊ីន​ប៉ិច​ លោក​ផ្កាយ​ពីរ​អ៊ុត​ សាខន, លោក​ផ្កាយ​មួយ​ម៉ែន​ សា​រ៉ន​មក​ពី​គណ​បក្ស​ហ្វុន​ស៊ីន​ប៉ិច​ និង លោក​ផ្កាយ​មួយ​ គៀង សា​វន​ មក​ពី​គណ​បក្ស​សម​រង្សី​ ត្រូវ​គេ​ចោទ​ប្រកាន់​ថា​ បង្កើត​ក្រុម​ប្រ​ដាប់​អាវុធ​ដើម្បី​ប្លន់​។​ ការ​ចាប់​ខ្លួន​ធ្វើ​ឡើង​ក្រោយ​ពី​ចាប់​បាន​ក្រុម​ប្លន់​ប្រដាប់​វុធ​ចំនួន​ ៧​នាក់​ ដែល​ធ្វើ​ការ​ប្លន់​អស់​ជា​ច្រើន​លើក​ច្រើន​សារ​មក​ហើយ​។​

ថ្ងៃទី ២០ សំដេច​នរោត្ដម​សីហនុ​ អតីត​ព្រះ​មហា​ក្សត្រ​ខ្មែរ​ដែល​គង់​នៅ​ប៉េ​កាំង​ជា​ប្រចាំ​ បាន​ចេញ​ព្រះ​រាជ​សារ​មួយ​យ៉ាង​គួរ​អោយ​ភ្ញាក់​ផ្អើល​ ព្រះ​អង្គ​ទ្រង់​ព្រះ​លិខិត​ថា​ មាន​ក្រុម​អិស្សរ​ជន​មួយ​ក្រុម​ គឺ​ក្រុម​រាជ​វង្ស​ស៊ី​សុវត្ថិ​ កំពុង​រៀប​ចំ​ផ្សំ​គំនិត​គ្នា​ ដើម្បី​ទំលាក់​ព្រះ​មហា​ក្សត្រ​បច្ចុប្បន្ន​ព្រះ​បាទ​នរោត្ដម​សីហ​មុនី​ ដ៏​មាន​ប្រជា​ប្រីយ​ភាព​ បរិ​សុទ្ធ ស្អាត​ស្អំ ដើម្បី​យក​រាជ​បល្ល័ង្គ​ថ្វាយ​ព្រះ​អង្គ​ម្ចាស់​មួយ​អង្គ​សែ​ ស៊ីសុវត្ថិ ជា​អ្នក​គ្រង​រាជ​សម្បត្ដិ​វិញ​។

ថ្ងៃ ទី២១ មករា សំដេច​នរោត្ដ​សីហនុ​ ដែល​កំពុង​គង់​ប្រថាប់​នៅ​ទី​ក្រុង​ប៉េ​កាំង​ បាន​ចេញ​រាជ​សារ​មួយ​ដែល​ព្រះ​អង្គ​​ទ្រង់​ព្រះ​លិខិត​ថា​ មាន​អិស្ស​រជន​មួយ​ក្រុម​ គឺ​ក្រុម​សែ​ស៊ី​សុវត្ថិ កំពុង​រៀប​ចំផ្សំ​គំនិត​ ដើម្បី​ទំលាក់​ព្រះ​មហា​ក្សត្រ​បច្ចុប្បន្ន​គឺ​ព្រះ​បាទ​នរោត្ដម​ សីហ​មុនី​ ដ៏​មាន​ប្រ​ជា​ប្រីយ​ភាព​ ស្អាត​ស្អំ​បំផុត​ ដើម្បី​អោយ​ព្រះ​អម្ចាស់​​មួយ​អង្គ​សែ​ស៊ី​សុវត្ថិ​ក្លាយ​ជា​ព្រះ​មហា​ក្សត្រ​។​

ថ្ងៃទី ២២​មករា លោក​ហេង សំរិន ប្រ​ធាន​រដ្ឋ​សភា​កម្ពុជា​ ដឹក​នាំ​គណ​ប្រតិ​ភូម​មួយ​ក្រុម​ទៅ​ធ្វើ​ទស្សន​កិច្ច​នៅ​រុស្សី​។​ដោយ​​លែក​ប្រេង​សាំង​នៅ​កម្ពុជា​បាន​ចុះ​ថ្លៃ​បន្ដិច​ រដ្ឋា​ភិបាល​ប្រកាស​បើក​ចំហ​ អោយ​មាន​ការ​នាំ​ប្រេង​សាំង​ចូល​មក​អោយ​កាន់​តែ​ច្រើន​ ដើម្បី​អោយ​មាន​ការ​ប្រគួន​ប្រជែង​ តំលៃ​ប្រេង​សាំង​ នឹង មាន​ការ​ចុះ​ថោក​។​

ថ្ងៃទី ២៧​​មករា រឿង​ចំរោង​ចំរាស់​មួយ​ទៀត​កើត​ឡើង​ទៀត​ អតីត​ព្រះ​មហា​ក្សត្រ​ខ្មែរ​នរោ​ត្ដម​សីហនុ​ បាន​ចេញ​រាជ​សារ​មួយ​ទៀត​ ចោទ​​ប្រកាន់​លោក​ខែក​ វ៉ាន់​ឌី បុត្រ​ប្រសា​ ជា​ស្វាមី​របស់​ព្រះ​អង្គ​ម្ចាស់​ក្សត្រី​បុប្ផា​ទេវី​បុត្រី​របស់​ព្រះ​អង្គ​បានទូល​ព្រះ​មហា​ក្សត្រ​ព្រះ​បាទ​នរោត្ដម​ សី​ហមុ​នី​ថា​ គណ​បក្ស​ប្រជា​ជន​មិន​ពេញ​ចិត្ដ​ នឹង ព្រះ​មហា​ក្សត្រ​សព្វ​ថ្ងៃ​នេះ​ទេ​ដោយ​ព្រះ​អង្គ​ជឿ​ស្ដាប់​តែ​តាម​បីតា​របស់​ព្រះ​អង្គ​ច្រើន​ពេក​។​ រឿង​នេះ​ធ្វើ​អោយ​លោក​នាយក​រដ្ឋ​មន្រ្ដី​ហ៊ុន​ សែន​ខឹង​ច្រលោត​តោត​តូង​ ទាម​ទារ​អោយ​លោក​ខែក​ វ៉ាន​ឌី​ស្រាយ​បំភ្លឺ​ក្នុង​រឿង​នេះ​ លោក​ខែក​វ៉ាន​ឌី​ បាន​សរ​សេរ​លិខិត​សុំ​ទោ​ស​មួយ​ជូន​ទៅ​លោក​ហ៊ុន​ សែន ហើយ​ដែល​គាត់​បាន​អនុ​គ្រោះ​ទោស​អោយ​នៅ​ថ្ងៃ​នេះ​។​

ថ្ងៃទី២៨ មករា សំដេច​សីហនុ បាន​ស្នើ​សុំ​អោយ​គេ​ដឹក​នាំ​ស្រ្ដី​ខ្មែរ​ ដែល​គេ​បោះ​បង់​ចោល​ នៅ​កោះ​តៃ​វ៉ាន់​ កូរ៉េ​ខាង​ត្បូង​ ម៉ា​លេស៊ី ថៃ វៀត​ណាម​ អោយ​វិល​ត្រលប់​មក​កាន់​កម្ពុជា​វិញ​ ដោយ​ព្រះ​អង្គ​ធនា​ជា​អ្នក​ចេញ​សោ​ហ៊ុយ​ក្នុង​ការ​ដឹក​ជញ្ជូន​ពួក​ស្រ្ដី​ទាំង​នោះ​។​

ថ្ងៃ​ទី ២៩​មក​រា រដ្ឋា​ភិបាល​ប្រទេស​កម្ពុជា​បាន​ស្នើ​សុំ​អោយ​ប្រ​ទេស​រុស្សី​លុប​ចោល​បំនុល​ចំនួន​ ១.៥០០​លាន​ដុល្លារ​អា​មេ​រិក​ ដែល​កម្ពុជា​បាន​ជំពាក់​នា​សម័យ​កម្ពុជា​ប្រជា​មា​និត​។​

-----ព្រឹត្ដិការណ៍ កុម្ភ ២០០៧-----

ថ្ងៃ ទី​២ កុម្ភ រាជសារ​មួយ​ចេញ​ដោយ​សំដេច​សីហនុ​ ព្រះ​អង្គ​ទ្រង់​ព្រះ​លិខិត​ថា​ វា​ដល់​ពេល​ហើយ​សំរាប់​រាជ​វង្ស​ទាំង​ឡាយ​ឈប់​ធ្វើ​នយោ​បាយ​។

ថ្ងៃទី៦ កុម្ភ លោក​ស្រី​មិ​សេ​លិន​ កាល​មី​រៃ​ ប្រ​មុខ​រដ្ឋា​ភិបាល​សហ​ព័ន្ធ​ស្វីស​ បាន​អញ្ជើញ​មក​ធ្វើ​ទស្សន​កិច្ច​នៅ​កម្ពុជា​ចំនួន​ពីរ​ថ្ងៃ​ ក្នុង​ពិធី​បុណ្យ​ខួប​គំរប់​ ៥០​ឆ្នាំ នៃ​ទំនាក់​ទំនង​ស្វីស​កម្ពុជា​ លោក​ស្រី​បាន​បាន​ចូល​ទៅ​ធ្វើ​ទស្សន​កិច្ច​ក្នុង​មន្ទីរ​ពេទ្យ​កុមារ​គន្ធ​បុប្ផា​ ដែល​មាន​លោក​វិជ្ជ​បណ្ឌិត​ បេអាដ​ រិក​នើរ​ ជន​ជាតិ​ស្វីស​ជា​ស្ថាប​និក​ លោក​ស្រី​ក៏​អញ្ចើញ​ទៅ​ខេត្ដ​សៀម​រាប​ផង​ដែរ​ ដើម្បី​ទៅ​មើល​មន្ទីរ​ពេទ្យ​កុមារ​ និង ប្រា​សាទ​បន្ទាយ​ស្រី​ផង​ ដែល​រដ្ឋា​ភិបាល​ស្វីស​ជា​អ្នក​ធ្វើ​ការ​ជួស​ជុល​ប្រ​សាទ​នេះ​ឡើង​វិញ​។​

ថ្ងៃទី ៩ កុម្ភ កប៉ាល់​សហ​រដ្ឋ​អា​មេ​រិក​ឈ្មោះ USS GARY បាន​ចូល​មក​ចត​នៅ​កំពុង​ផែ​ព្រះ​សីហនុ​ នេះ​ជា​​ការ​ចូល​មក​ចត​ជា​លើក​ដំបូង​ តាំង​ពី​មាន​សង្គ្រាម​បាន​យាយី​ នៃ ប្រ​ទេស​កម្ពុជា​កាល​ពី​ជាង​ ៣០​ឆ្នាំ ផ្លាយ​មុន​ ការ​ចូល​មក​ចត​ នៃ នាវា​ដែល​មាន​កង​ពល​នា​វិក​ចំនួន​ ២២៤​នាក់​នេះ​ គឺ​ធ្វើ​ឡើង​ដើម្បី​ពង្រឹក​កិច្ច​សហ​ប្រតិ​បត្ដិ​ការ​រវាង​កង​ទ័ព​ជើង​ទឹក​ នៃ ប្រ​ទេស​ទាំង​ពីរ​។​

ថ្ងៃទី ១២​កុម្ភ ប្រ​ទេស​ម្ចាស់​ជំនួយ​ដែល​បាន​សំដែង​ នូវ ការ​ខក​ចិត្ដ​ និង បន្ទោស​​ចំពោះ​រាជ​រដ្ឋា​ភិ​បាល​កម្ពុជា​ថា​ មាន​ការ​យឺត​យាវ​ក្នុង​ការ​ធ្វើ​អោយ​ចេញ​ច្បាប់​ប្រឆាំង​ នឹង អំពើ​ពុក​រលួយ​ថ្មី​នេះ​ បាន​ប្រ​កាស​ផ្ដល់​ជំនួយ​អិត​ចំនង​ដល់​រដ្ឋា​ភិបាល​កម្ពុ​ជា​ នូវ ​ទឹក​ប្រាក់​ចំនួន​ ១៤​លាន​ដុល្លារ​សហ​រដ្ឋ​អា​មេរិក​។

ថ្ងៃទី ១៩ កុម្ភ លោក លន់ រិទ្ធ កូន​ប្រុស​អតីត​ប្រធា​នា​ធិប​តី លន់ នល់ មាន​អាសយដ្ឋាន​នៅ​សហ​រដ្ឋ​អា​មេ​រិក បាន​បង្កើត​គណ​បក្ស​មួយ​ឈ្មោះ​ គណ​បក្ស​សាធា​រណ​រដ្ឋ​ខ្មែរ​ ដែល​ក្រសួង​មហា​ផ្ទៃ​បាន​ទទួល​ស្គាល់​រួច​ស្រេច​ហើយ​ ថ្ងៃ​នេះ​អគ្គ​លេខា​ធិការ​បក្ស​ លោក​ញ៉ិន ព្រះ​ បាន​ប្រកាស​អោយ​ដឹង​ជា​សាធា​រណ​ថា​ គណ​បក្ស​របស់​លោក​ នឹង ចូល​រួម​ប្រ​កួត​ប្រ​ជែង​បោះ​ឆ្នោត​នៅ​ឆ្នាំ​២០០៨ ខាង​មុខ​នេះ​។

ថ្ងៃទី ២១ កុម្ភ ទាហាន​ឈុត​ខ្មៅ​ថៃ​ប្រមាណ​១៥០​នាក់​ ប្រដាប់​ដោយ​អាវុធ​ បាន​ចូល​មក​រុះ​រើ​ផ្ទះ​អ្នក​ស្រុក​អស់​ជា​ច្រើន​ខ្នង​ នៅ​ភូម​សមា​គម​ ឃុំ​ត្រពាំង​ព្រៃ​ ស្រុក​អន្លង់​វែង​ ខេត្ដ​អុត្ដរ​មាន​ជ័យ​។

ថ្ងៃ ទី២៣ កុម្ភ ពត៌​មាន​ដ៏​មហា​ភ្ញាក់​ផ្អើល​មួយ​បាន​ផ្ទុះ​ឡើង​នៅ​ទី​ក្រុង​ភ្នំ​ពេញ​ នាង ពៅ​បញ្ញា​ពេជ្រ​ ជា​កញ្ញា​អ្នក​ចំរៀង​ដ៏​មាន​ប្រជា​ប្រិយ​ភាព​ល្បី​ម្នាក់​ទៀត​ហើយ​ ត្រូវ​ឃាត​ករ​ពីរ​នាក់​បាញ់​នាង​ចំនួន​ពីរ​គ្រាប់​ ដែល​មួយ​គ្រប់​ត្រូវ​ក្រង់​ក​ និង មួយ​គ្រាប់​ទៀត​ត្រូវ​ស្មា​ធ្លាយ​ចេញ​ត្រង់​ចង្កេះ​ នាង​ត្រូវ​ក្រុម​គ្រួសារ​ដឹក​យក​ទៅ​សង្គ្រោះ​នៅ​មន្ទីរ​ពេទ្យ​ចារី​នៃ​ប្រ​ទេស​វៀត​ណាម​ជា​បន្ទាន់​។

ថ្ងៃទី ២៤ កុម្ភ ក្រោយ​ពី​ការ​បាញ់​ប្រហារ​ទៅ​លើ​នាង​ពៅ បញ្ញា​ពេជ្រ​ បាន​មួយ​ថ្ងៃ​ លោក ហ៊ី​ វុទ្ធី​ ប្រធាន​សហ​ជីព​សេរី​​កម្មករ​នៅ​រោង​ចក្រ​កាត់​ដេរ​សាន់​តិច​ ត្រូវ​ឃាត​ករ​បាញ់​សំលាប់​នៅ​ពេល​ដែល​គាត់​ចេញ​ពី​ធ្វើ​ការ​។

ថ្ងៃទី ២៧ កុម្ភ ព្រះ​សង្ឃ​កម្ពុជា​ក្រោម​ជា​ច្រើន​អង្គ​ បាន​ព្យា​យាម​ប្រមូល​ផ្ដុំ​គ្នា​នៅ​ជិត​ស្ថាន​ទូត​វៀត​ណាម​ នៅ​ក្នុង​ក្រុង​ភ្នំពេញ​ ដើម្បី​ទាម​ទារ​អោយ​អាជ្ញា​ធម៌​វៀត​ណាម​ បញ្ឈប់​ការ​ចាប់​ផ្សឹក​ព្រះ​សង្ឃ​នៅ​ខេត្ដ​ឃ្លាំង​កម្ពុជា​ក្រោម​ ដែល​អាជ្ញា​ធម៌​វៀត​ណាម​បាន​ចាប់​ផ្សឹក​អស់​ចំនួន​៣​អង្គ​ ហើយ​កំ​ពុង​ប៉ុន​ប៉ង​ចាប់​ផ្សឹក​បន្ដ​ទៀត​ ក្រោ​យពី​ព្រះ​សង្ឃ​ទាំង​​នេះ​​ ធ្វើ​បាតុ​កម្ម​ ទាម​អោយ​អាជ្ញា​ធម៌​វៀត​ណាម​ បញ្ឈប់​ការ​ហាម​ឃាត់​ព្រះ​អង្គ​ មិន​អោយ​ចេញ​ដើរ​បិណ្ឌ​បាត​។ ការ​ប្រ​មូល​ផ្ដុំ​ព្រះ​សង្ឃ​ខ្មែរ​ក្រោម​នៅ​ភ្នំ​ពេញ ​ធ្វើ​ឡើង​ នៅ​ពេល​ដែល​ប្រធានា​ធិប​តី​វៀត​ណាម ​កំពុង​ធ្វើ​ទស្សន​កិច្ច​នៅ​កម្ពុជា​ តែ​ការ​ប្រមូល​ផ្ដុំ​របស់​ក្រុម​ព្រះ​សង្ឃ​ទាំង​នេះ​ ត្រូវ​រា​រាំង​ដោយ​កង​ប៉ូ​លិស​កម្ពុជា​ចំនួន​ ២០០​នាក់​មិន​អោយ​ធ្វើ​ការ​ជួប​ជុំ​គ្នា​បាន​ឡើយ​។​

ថ្ងៃទី ២៨កុម្ភ ធម្មយា​ត្រា​មួយ​ទៀត​រៀប​ចំ​ដោយ​មជ្ឈ​មណ្ឌល​សិទ្ធិ​មនុស្ស​របស់​លោក​កឹម​ សុខា បាន​រៀប​ចំ​ធ្វើ​នៅ​ថ្ងៃ​​នេះ​ដោយ​ដំនើរ​ថ្មើរ​ជើង​ ចាប់​ចេញ​ដំនើរ​ពី​ចំនុច​វត្ដ​ភ្នំ​ ឆ្ពោះ​ទៅ​កាន់​ប្រាសាទ​អង្គរ​វត្ដ​ក្នុង​ខេត្ដ​សៀម​រាប​ គេ​ឃើញ​មាន​វត្ដ​​មាន​អិស្ស​រ​ជន​គណ​បក្ស​ប្រឆាំង​ មាន​លោក​សម​រង្សី​ជា​ដើម​បាន​ចូល​រួម​ដំនើរ​នេះ​ដែរ​​។