ព្រឹត្ដិការណ៍ ឧសភា ២០០៦


ថ្ងៃសៅរ៍ ទី 7.ឧសភា 2022.ម៉ោង 8:06

ថ្ងៃទី ៣ ឧសភា ក្នុង​ពិធី​ប្រា​រព្វ​ទិវា​សេរី​ភាព​ពត៌​មាន​ នៅ​ទី​ក្រុង​ភ្នំ​ពេញ សហ​រដ្ឋ​អា​មេ​រិក​បាន​គាំ​ទ្រ​យ៉ាង​ខ្លាំង​ចំពោះ​សេរី​ភាព​បញ្ចេញ​មតិ​នៅ​ប្រទេស​កម្ពុជា​ មន្ដ្រី​ការ​ទូត​បស្ចឹម​ប្រ​ទេស​នានា​បាន​និយាយ​ថា សេរី​ភាព​សារ​ពត៌​មាន​នៅ​កម្ពុជា​នៅ​ដើម​ឆ្នាំ​២០០៦​នេះ​ មាន​ភាព​ប្រសើរ​ជាង​ឆ្នាំ​ ២០០៥ និង ឆ្នាំ​មុន​ៗ​ច្រើន​។​

ថ្ងៃទី ៤ឧសភា ក្រុម​អុត្ដម​ប្រឹក្សា​អង្គ​ចៅ​ក្រម​ ដែល​មាន​ព្រះ​មហា​ក្សត្រ​នរោ​ត្ដម​ សីហ​មុនី​ជា​ប្រធាន​ បាន​បើក​កិច្ច​ប្រជុំ​មួយ​ដោយ​សំងាត់​នៅ​ក្នុង​រាជ​វាំង​ ដើម្បី​អនុ​ម័ត​បញ្ជី​រាយ​នាម​ មន្រ្ដី​តុលា​ការ​ ១៧​នាក់​ ជា​មន្រ្ដី​ខ្មែរ​ និង ១២​នាក់​មន្រ្ដី​បរ​ទេស​ តែង​តាំង​ដោយ​អ.ស.ប​។ ក្នុង​មន្រ្ដី​ទាំង​ ២៩​នាក់​នេះ​ មន្រ្ដី ១៤​នាក់​ ត្រូវ​ជ្រើស​រើស​អោយ​ធ្វើ​ជា​ចៅ​ក្រម​តុលា​ការ​ជាន់​ខ្ពស់​ សំរាប់​កាត់​ទោស​អតីត​មេ​ដឹក​នាំ​ជាន់​ខ្ពស់​ខ្មែរ​ក្រហម​។​
ជា​​មួយ​គ្នា​នេះ​ដែរ លោក​ហ៊ុន​ សែន ប្រកាស​អោយ​ព្រះ​សង្ឃ​ខ្មែរ​ អាច​ទៅ​ចុះ​ឈ្មោះ​បោះ​ឆ្នោត​បាន​ បន្ទាប់​ពី​មាន​ការ​យល់​ព្រម​ពី​សំដេច​សង្ឃ​រាជ​គណ​មហា​និកាយ​ទេព​ វង្ស។

ថ្ងៃទី ៨ ឧសភា បន្ទាប់​ពី​ព្រះ​មហា​ក្សត្រ​ខ្មែរ​ លាយ​ព្រហស្ថ​លេខា​តែង​តាំង​ចៅ​ក្រម​សាលា​ក្ដី​កាត់​ទោស​ខ្មែរ​ក្រហម​ ចុះ​ថ្ងៃ​ទី​ ៧​ឧសភា ២០០៦ (រាជ​ក្រិត្យ​លេខ​ ន ស រ ក ត ០៥០៦.២១៤)​។ គណ​កម្ម​ការ​ប្រ​ព្រឹត្ដិ​កម្ម​ដែល​ជា​អង្គ​ការ​សមា​គម​ចំនួន​ ២១​ បាន​សំដែង​ការ​ព្រួយ​បារម្ភ​ និង រិះ​គន់​ ចំពោះ​សមា​សភាព​ចៅ​ក្រម​ និង ព្រះ​រាជ​អាជ្ញា​ជាតិ​ក្នុង​អង្គ​ជំនុំ​ជំរះ​វិសា​មញ្ញ​នេះ​។​លោក​នាយក​រដ្ឋ​មន្រ្ដី​ហ៊ុន​ សែន បាន​ប្រតិ​កម្ម​ចំពោះ​មតិ​រិះ​គន់​នេះ​ដោយ​មិន​បញ្ចេញ​ឈ្មោះ ដោយ​សំដី​ដ៏​ក្រោត​គ្រាត​ជា​ទី​បំផុត​ ដែល​ទំនង​ជា​វាយ​ប្រហារ​សំដៅ​ទៅ​លើលោក​ ឡៅ ម៉ុង​ហៃ ថា​ ជា​សត្វ​ធាតុ​។

ថ្ងៃទី ១២ ឧសភា នៅ​ឃុំ​កំបូល​ ខាង​លិច​អាកាស​យាន​ដ្ឋាន​ពោធិ​ចិន​តុង​ ក្នុង​មន្ទីរ​សាលា​ក្ដី​កាត់​ទោស​មេ​ដឹក​នាំ​ខ្មែរ​ក្រហម​ ដែល​ទើប​សាង​សង់​ឡើង​ថ្មី​ៗ​នេះ​ គេ​នាំ​គ្នា​ធ្វើ​ការ​ប្រារព្ធ​ពិធី​ឡើង​ អ្នក​តា​ដំបង​ដែក​ ទៅ​តាម​ជំនឿ​ទំនៀម​ទំលាប់​ខ្មែរ​។​ លោក​ស៊ាន វិសុទ្ធ និង លោក​ស្រី​មីសែ​លី បាន​អញ្ជើញ​ចូល​រួម​ជា​អធិប​តេយ្យ​ភាព​។ ការ​រៀប​ចំ​រោង​អ្នក​តា​នេះ​ គឺ​ដើម្បី​ទុក​ជា​វត្ថុ​សក្ដិ​សិទ្ធ​ សំរាប់​អោយ​សាក្សី​ឡើង​ស្បថ​សច្ចា​ មុន​ នឹង ឡើង​ឆ្លើយ​បំភ្លឺ​នៅ​មុខ​តុលា​ការ​។​

ថ្ងៃទី ១៤ ឧសភា ព្រះ​មហា​ក្សត្រ​ខ្មែរ​ នរោត្ដម សីហ​មុនី បាន​យាង​ទៅ​ធ្វើ​ពី​បុណ្យ​ខួប​កំនើត​របស់​ព្រះ​អង្គ​នៅ​ក្នុង​វត្ដ​ព្រះ​ពុទ្ធ​មហា​វ័ន​ ក្នុង​ភូមិ​អូរ​ខ្លី​ ស្រុក​ភ្នំ​ស្រួច​ ខេត្ដ​កំពង់​ស្ពឺ​ ដែល​ជា​តំបន់​ចុង​កាត់​មាត់​ញក​មួយ​ ព្រះ​អង្គ​បាន​នាំ​យក​វត្ថុ​អំនោយ​ជា​ច្រើន​កញ្ចប់​ទៅ​ចែក​ដល់​ជន​ក្រី​ក្រ​នៅ​ទី​នោះ​ផង​ដែរ​។

ថ្ងៃទី ១៥ ឧសភា ការ​មក​ដល់​ នៃ លោក​ស្រី​ល្វីស​ អាបួរ​ ប្រធាន​សិទ្ធ​មនុស្ស​ នៃ អង្គ​ការ​សហ​ប្រជា​ជាតិ​ (អ.ស.ប) ក្នុង​ដំនើរ​ទស្សន​កិច្ច​ចំនួន​ប្រាំ​ថ្ងៃ​នៅ​ទី​ក្រុង​ភ្នំពេញ​ ដើម្បី​ដោះ​ស្រាយ​ទំនាស់​រវាង​កម្ពុជា​ និង អង្គ​ការ​សិទ្ធិ​មនុស្ស​នៅ​កម្ពុជា​ បន្ទាប់​ពី​លោក​ ហ៊ុន សែន ខឹង​ច្រលោត​តោត​តូង​ ប្រកាស​វាយ​ប្រហារ​យ៉ាង​ខ្លាំង​ទៅ​លើ​លោក យ៉ាស​ហ្ហាយ​ ដែល​បាន​ធ្វើ​របាយ​ការណ៍​មួយ​ថា សិទ្ធិ​មនុស្ស​នៅ​កម្ពុ​ជា​ពុំ​មាន​ការ​រីក​ចំរើន​ទេ​ អំណាច​បាន​ប្រមូល​ផ្ដុំ​ទៅ​លើ​តែ​មនុស្ស​ម្នាក់​។ លោក​ស្រី​មាន​គំរោង​ចូល​កល​ព្រះ​មហា​ក្សត្រ​ខ្មែរ​ ចូល​ជួប​ពិភាក្សា​ជា​មួយ​ប្រមុខ​រដ្ឋា​ភិបាល​ ហ៊ុន សែន និង ចូល​ជួប​អង្គ​សិទ្ធ​មនុស្ស​របស់​លោក​កឹម សុខា​ផង​ដែរ​។

ថ្ងៃទី ១៦ ឧសភា ប្រារព្វ​ធ្វើ​ពិធី​ច្រត់​ព្រះ​នង្គល នៅ​វាល​មេរុ​ ព្រះ​មហា​ក្សត្រ​ខ្មែរ​ នរោត្ដម​សីហ​មុនី ទ្រង់​យាង​ជា​អធិប​តីលោក​យូ ហុកគ្រី និង ភរិយា​ ត្រូវ​បាន​តែង​តាំង​ជា​ស្ដេច​នាគ និង មេ​ហួ។​

ថ្ងៃទី ១៧ ឧសភា មាន​ខិត្ដ​បណ្ណ​បាច​នៅ​ខណ្ឌ​ទួល​គោក​ ខណ្ឌ​ចំការ​មន​ សរ​សេរ​វាយ​ប្រហារ​រិះ​គន់​ធ្ងន់​ៗ​ ទៅ​លើ​​ថ្នាក់​ដឹក​នាំ​រដ្ឋា​ភិបាល​ ខិត្ដ​បណ្ណ​​មាន​រូប​សញ្ញា​ក្បាល​ខ្លា​បី​ ហើយ​សរ​សេរ​អក្សរ​កាត់​ ខ រ​ បាន​សរ​សេរ​រិះ​គន់​យ៉ាង​ខ្លាំង​ៗ​ទៅ​លើ​នាយក​រដ្ឋ​មន្រ្ដី​ហ៊ុន សែន​ដោយ​ចោទ​ប្រកាន់​ថា​ ជា​ជន​ក្បត់​ជាតិ​ ធ្វើ​អ្វី​តាម​តែ​បញ្ជា​យួន​ជា​ចៅ​ហ្វាយ​ ដោយ​បាន​កាត់​ដី​អោយ​យួន ជា​មេ​ភ្លើង​អស្ថិរ​ភាព​សង្គម​ បង្កើត​អោយ​មាន​ចលា​ចល​ក្នុង​ស្រុក​ខ្មែរ​ ដោយ​ចាប់​មនុស្ស​ដាក់​គុក​គ្មាន​ឈប់​ឈរ​ លោក​ហ៊ុន​ សែន កំពុង​រំលាយ​រាជ​វង្ស​ ជា​មនុស្ស​ខូច​សរ​សៃ​ប្រាសាទ​ និង ពាក់​ពាន់ ​នឹង ស្រី​ញី​ទៀត​ផង​។​

ថ្ងៃទី ១៨ឧសភា លោក​សម​រង្សី​ បាន​ប្រគល់​អង្គ​រក្ស​ចំនួន​១២​នាក់ និង ឡាន​មួយ​ជូន​ទៅ​រដ្ឋា​ភិ​បាល​វិញ​ ឡាន និង អង្គ​រក្ស​​ទាំង​នេះ​ គណ​បក្ស​សម​រង្សី​បាន​ស្នើ​សុំ​ពី​រដ្ឋា​ភិបាល​អោយ​មក​ការ​ពារ​សន្ដិ​សុខ​ជូន​លោក​សម​រង្សី​ កាល​ពី​លោក​វិល​ត្រលប់​ចូល​ប្រទេស​ខ្មែរ​វិញ​ពី​ខែ​កុម្ភ​។​

ថ្ងៃទី២៣ ឧសភា ការ​បោះ​ឆ្នោត​ក្នុង​មន្ទីរ​រដ្ឋ​សភា​ដក​ហូត​តំណែង លោក​ញ៉េប ប៊ុន​ជិន មន្រ្ដី​ក្រសួង​ការ​ងារ​ និង​ វិជ្ជា​ជីវៈ​ មក​​ពី​គណ​បក្ស​ហ្វុន​ស៊ីន​ប៉ិច របស់​ទ្រង់​នរោត្ដម​រណរិទ្ធ​ មាន​ ៨២​សំលេង​ស្រប​ ៧​សំលេង​ជំទាស់​ ១១​សំលេង​អុប​វាទ​ ១​សំលេង​​ជា​មោឃ​។​ លោក​វង សូត្រ មក​ពី​គណ​បក្ស​ប្រជា​ជន​អតីត​រដ្ឋ​លេខា​ធិការ​ ត្រូវ​បាន​ដាក់​ជំនួស​លោក​ញ៉េប​ ប៊ុន​ ជិន​ក្នុង​មុខ​តំណែង​នេះ​។ នេះ​ជា​ការ​បោះ​ឆ្នោត​លើក​ដំបូង​បំផុត​នៅ​មន្ទីរ​រដ្ឋ​សភា​ ដែល​យក​ច្បាប់​បោះ​ឆ្នោត​ ៥០ បូក​១ ដែល​ទើប​កែ​ប្រែ​នោះ​មក​ប្រើ​។ លោក​ហ៊ុន សែន នាយក​រដ្ឋ​មន្រ្ដី​បាន​ចូល​រួម​ក្នុង​ការ​បោះ​ឆ្នោត​នេះ​ដែរ​ លោក​បាន​និយាយ​ថា​ ការ​​ហូត​តំណែង​បែប​នេះ​មិន​ទាន់​ចប់​អស់​ទេ​ នឹង ត្រូវ​ធ្វើ​ជា​បន្ដ​បន្ទាប់​ទៀត​។​

ថ្ងៃទី ២៦ ឧសភា ការ​យាង​វិល​ត្រលប់​ចូល​កម្ពុជា​វិញ​ របស់​សំដេច​នរោ​ត្ដម​ សីហនុ និង ព្រះ​ជយា​ បន្ទាប់​ពី​នីរ​ទេស​ខ្លួន​​ព្រះ​អង្គ​ទៅ​ព្យា​បាល​រោគ​ អស់​រយ​ពេល​ជាង​៨​ខែ​ នៅ​បរ​ទេស​ (ប្រ​ទេស​ចិន​) ព្រះ​មហា​ក្សត្រ​ នរោត្ដម​សីហមុនី​ជា​ព្រះ​រាជ​បុត្រ​, លោក​ហ៊ុន សែន, ប្រធាន​សភា, ប្រធាន​ព្រិទ្ធ​សភា​ និង​ មន្រ្ដី​មក​ពី​គណ​បក្ស​ធំ​ៗ​ទាំង​បី​ បាន​យាង​ និង អញ្ជើញ​ទៅ​ទទួល​ស្វា​គមន៍​ព្រះ​អង្គ​នៅ​ព្រលាន​យន្ដ​ហោះ​ពោធិ​ចិន​តុង​។​
រដ្ន​សភា​បើក​កិច្ច​ប្រជុំ​ កែ​ប្រែ​ច្បាប់​រដ្ឋ​ធម្ម​នុញ្ញ​មាត្រា​ទី​ ៦៣​ ពី​បទ​បរិ​ហារ​កេរ្ដ​ ពី​ការ​ជាប់​គុក​ អោយ​មក​ធ្វើ​ការ​បង់​ប្រាក់​ពី​ ១​លាន​រៀល ទៅ​ដប់​លាន​រៀល​។

ថ្ងៃទី ២៨ ឧសភា លោក​ញឹក ប៊ុនឆៃ អគ្គ​លេខា​ធិការ​គណ​បក្ស​ហ្វុន​​ស៊ីន​ប៉ិច បាន​ដឹក​នាំ​មន្រ្ដី​ហ្វុន​​ស៊ីន​ប៉ិច​មួយ​ក្រុម​ទៅ​ធ្វើ​ទស្សន​កិច្ច​នៅ​ប្រទេស​ចិន​កុម្មុយ​និស្ដ​។ ក្រោយ​ពី​យាង​វិវត្ដន៍​ចូល​ប្រទេស​កម្ពុជា​បាន​មួយ​ថ្ងៃ ​សំដេច​នរោត្ដម​សីហនុ​ បាន​បង្ហាញ​ព្រះ​ភ័ក្រ្ដ​តាម​កញ្ចក់​ទូរ​ទស្ស​នៅ​កម្ពុជា​ ព្រះ​អង្គ​បាន​បួង​សួង​សូម​អោយ​ប្រទេស​កម្ពុជា​ ដែល​ដឹក​នាំ​ដោយ​លោក​នាយក​រដ្ឋ​មន្រ្ដី​ហ៊ុន​ សែន មាន​សេដ្ឋ​កិច្ច​រឹង​មាំ​ រីក​ចំរើន​ និង សូម​អោយ​មាន​ទឹក​ភ្លៀង​បរិ​បូរ​សំរាប់​ប្រជា​រាស្រ្ដ​បាន​បង្ក​បង្កើត​ផល​របរ​កសិកម្ម​។ ព្រះ​អង្គ​បាន​ប្រកាស​នៅ​ព្រលាន​យន្ដ​ហោះ​ពោធិ​ចិន​តុង​ថា​ ព្រះ​អង្គ​មិន​ធ្វើ​នយោ​បាយ​ទេ​ ព្រះ​អង្គ​សូម​គង់​នៅ​ជា​មួយ​​ចំរៀង​ បទ​ភ្លេង​ និង​ ខ្សែ​ភាព​យន្ដ​របស់​ព្រះ​អង្គ​វិញ​។​

ថ្ងៃទី២៩ ឧសភា ធនាគារ​ពិភព​លោក​ គំរាម​ថា​ នឹង រឹប​យក​ប្រាក់​ចំនួន​ ៦៤​លាន​ដុល្លារ​អា​មេ​រិក​ ដែល​គេ​ផ្ដល់​ដល់​កម្ពុជា​សំរាប់​ជំនួយ​គំរោង​អភិវឌ្ឍន៍​មួយ​ចំនួន​បន្ទាប់​ពី​ធនាគារ​មួយ​នេះ​បាន​រក​ឃើញ​ នូវ អំពើ​ពុក​រលួយ​យ៉ាង​ច្រើន​សន្ធឹក​សន្ធប់​ទាក់​ទង​ នឹង ស្ថាប័ន​ហិរញ្ញ​វត្ថុ​អន្ដរ​ជាតិ​នេះ​។ លោក​គាត ឈន់ រដ្ឋ​មន្រ្ដី​ក្រសួង​ហិរញ្ញ​វត្ថុ​ បាន​សរ​សេរ​លិខិត​ទៅ​ក្រសួង​ដែន​ដី​ន​គ​រូប​ន័យ​កម្ម​ ក្រសួង​អុស្សា​ហកម្ម​ រ៉ែ និង ថាម​ពល​ និង ក្រសួង​អភិ​វឌ្ឍន៍​ជន​បទ​ថា​ ធនា​គារ​ពិភព​លោក​បាន​ព្យួរ​ជា​បន្ដោះ​អាសន្ន​ នូវ ថវិ​ការ​ គំរោង​កសាង​សង់​ក្រសួង​បី​ គឺ​ក្រសួង​រៀប​ចំ​ដែន​ដី​ ក្រសួង​អានា​ម័យ​ និង ទឹក​ស្អាត​ និង ហេដ្ឋា​រចនា​សំព័ន្ធ​ជន​បទ​ ដោយ​គេ​បាន​រក​ឃើញ​ភាព​មិន​ប្រក្រតី​ជា​ច្រើន​ក្នុង​គំរោង​នេះ​។​

ថ្ងៃទី ៣០ ឧសភា មាន​លិខិត​ពីរ​ច្បាប់​មាន​រូប​សញ្ញា​ខុស​គ្នា​ មួយ​ច្បាប់​តំណាង​អោយ​សមា​ជិក​ហ្វុន​​ស៊ីន​ប៉ិច​ ពី​ប្រទេស​ (បារាំង កាណាដា សហ​រដ្ឋ​អាមេ​រិក) មួយ​ច្បាប់​ទៀត​មាន​រូប​សញ្ញា​គណ​បក្ស​ហ្វុន​​ស៊ីន​ប៉ិច​សព្វ​ថ្ងៃ​ តំណាង​អោយ​អ្នក​តស៊ូ​ដើម្បី​រាជា​និយម​ពិត​ប្រាកដ​។ លិខិត​បាន​លើក​ឡើង​ថា នឹង បង្កើត​គណ​បក្ស​ថ្មី​មួយ​ថ្វាយ​អោយ​សំដេច​​ក្រុម​ព្រះ​រណ​រិទ្ធ​គ្រប់​គ្រង​ គឺ​គណ​បក្ស​នរោត្ដម​រណ​រិទ្ធ​ លិខិត​នេះ​បាន​វាយ​ប្រហារ​ ថ្កោល​ទោស​យ៉ាង​ខ្លាំង​ក្លា​ ទៅ​លើ​អគ្គ​លេខា​ធិការ​បក្ស​លោក​ញ៉ឹក​ប៊ុនឆៃ​ និង បក្ស​ពួក​ ថា​ជា​ពួក​ក្បត់​ ហើយ​ចូល​ជា​មួយ ហ៊ុន សែន គណ​បក្ស​ប្រជា​ជន​។​