ព្រឹត្ដិការណ៍ ខែ មេសា ២០០៦


ថ្ងៃសៅរ៍ ទី 30.មេសា 2022.ម៉ោង 8:56

ថ្ងៃទី១ មេសា តាម​សំនើ​របស់​លោក​នាយក​រដ្ឋ​មន្ត្រី​ហ៊ុន សែន ព្រះ​មហា​ក្សត្រ​នរោត្ដម សី​ហ​មុនី​បាន​លាយ​ព្រហត្ថ​លេខា​ដក​លោក​ ឃឹម សិលា អភិ​បាល​ខេត្ដ​ស្ទឹង​ត្រែង​មក​ពី​គណ​បក្ស​ហ្វុន​ស៊ីន​ប៉ិច​ ហើយ​ដាក់​ជំនួស​ដោយ​លោក​ លោយ សុផាត​មន្រ្ដី​មក​ពី​គណ​បក្ស​ប្រជា​ជន​ នេះ​ជា​អភិ​បាល​ខេត្ដ​ហ្វុន​ស៊ីន​ប៉ិច​ទី​៦​ហើយ​ដែល​ត្រូវ​បាន​ដក​ចេញ​ពី​មុខ​ដំណែង​ សូម​រំលឹក​ថា​ លោក ស៊ីម សុន អភិ​បាល​ខេត្ដ​សៀម​រាប​, លោក គុច មុលី អភិ​បាល​ខេត្ដ​អុត្ដ​មាន​ជ័យ​, លោក​ហេង ចន្ថា​អភិ​បាល​ខេត្ដ​បន្ទាយ​មាន​ជ័យ​, លោក​លី សុន អភិ​បាល​ខេត្ដ​មណ្ឌល​គិរី​ បាន​ដក​ចេញ​ពី​មុខ​តំណែង​ហើយ​។

ថ្ងៃទី ៥មេសា មន្រ្ដីជាន់​ខ្ពស់​របស់​ហ្វុន​ស៊ីន​ប៉ិច ២​រូប​ទៀត​ត្រូវ​ដក​ហូត​ពី​មុខ​តំណែង គឺ​សំដេច​នរោត្ដម វិជ្ជរ៉ា ត្រូវ​ដក​ដំណែង​ពី​ប្រធាន​គណ​កម្ម​ការ​បរ​ទេស សហ​ប្រតិ​បត្ដិ​ការ​អន្ដ​ជាតិ​ ឃោសនា​ការ​ និង ពត៌​មាន​ នៃ រដ្ឋ​សភា ហើយ​ម្ចាស់​ក្សត្រី​បាន​យាង​ទៅ​គាល់​សំដេច​នរោត្ដម សីហនុ នៅ​ព្យុង​យ៉ាង​​កូរេ​ខាង​ជើង​។ លោក​ម៉ោញ សាផាន ត្រូវ​ដក​ចេញ​ពី​ប្រធាន​គណ​កម្ម​ការ​ការ​ពារ​ជាតិ​ អង្កេត​ និង បោស​សំអាត​។កកន ៖ ការដកដំណែងរបស់មន្ដ្រីហ្វុនស៊ីនប៉ិច ដូចគេដកកូនស្ពៃដែរ។

ថ្ងៃទី ៧មេសា រដ្ឋ​សភា​បើក​សម័យ​ប្រជុំ​ពេញ​អង្គ​ មាន​របៀប​វារៈ​មួយ​ចំនួន​ មាន​ការ​បោះ​ឆ្នោត​ផ្លាស់​ប្ដូរ​សមា​ជិក​រដ្ឋា​ភិបាល​ពីរ​ក្រសួង​ និង បោះ​ឆ្នោត​លុប​ចោល​គណ​កម្ម​ការ​ពីរ​មក​ពី​គណ​បក្ស​ហ្វុន​ស៊ីន​ប៉ិច​ អោយ​ទៅ​គណ​បក្ស​សម​រង្សី​វិញ​ គឺ​គណ​កម្ម​ការ​ទី៤​ (មហា​ផ្ទៃ បោស​សំអាត​ ការ​ពារ​ជាតិ​) ដែល​មាន​លោក​ម៉ោញ​ សាផាន​ ជា​ប្រធាន​ អោយ​ទៅ​លោក​យឹម សុវណ្ណ តំណាង​រាស្រ្ដ​គណ​បក្ស​សម​រង្សី​មណ្ឌល​ភ្នំ​ពេញ​។ ប្រធាន​គណ​កម្មការ​ទី​៥ របស់​សំដេច​នរោត្ដម​ វិជ្ចរ៉ា​ អោយ​ទៅ​លោក​សុន​ ឆ័យ​វិញ​។ នៅ​អែ​ព្រលាន​យន្ដ​ហោះ​អន្ដរ​ជាតិ​ពោធិ​ចិន​តុង​ មន្ដ្រី​ជាន់​ខ្ពស់​រដ្ឋា​ភិបាល​ មាន​លោក​ហ៊ុន សែន​លោក ស ខេង លោក ហោ ណាំហុង​ជា​ដើម​ ធ្វើ​ដំណើរ​លើ​កំរាល​ព្រហ្ម​ពណ៌​ក្រហម​ ទទួល​បដិ​សន្ឋារ​កិច្ច​លោក វិន យ៉ាប៉ាវ ដែល​ធ្វើ​ដំណើរ​មក​ធ្វើ​ទស្សន​កិច្ច​ចំនួន​ពីរ​ថ្ងៃ​នៅ​កម្ពុជា​។​

ថ្ងៃទី៨ មេសា ដំណើរ​វិល​ត្រលប់​ទៅ​របស់​លោក​វិន យ៉ា​ប៉ៅ​ ទៅ​កាន់​ស្រុក​ចិន​វិញ​ ជូន​ដំណើរ​ដោយ​មន្រ្ដី​ជាន់​ខ្ពស់​ខ្មែរ​មាន​លោក​នាយក​រដ្ឋ​មន្រ្ដី ហ៊ុន សែន ជា​ដើម​។ កម្ពុជា​ប្រកាស​ជំហ៊រ​ទទួល​ស្គាល់​ប្រទេស​ចិន​តែ​មួយ​ បដិ​សេធ​ប្រឆាំង​សំនើ​កោះ​តៃ​វ៉ាន់​ ដែល​ចង់​បាន​អែក​រាជ​ ផ្ដាច់​ខ្លួន​ពី​ចិន​។ លោក​ហោ ណាំហុង ប្រកាស​ប្រាប់​ថា ​ក្នុង​ទស្សន​កិច្ច​លោក​វិន យ៉ា​ប៉ៅ​នៅ​កម្ពុជា​ គឺ​ជា​ការ​បង្ហាញ​ នូវ កិច្ច​សហ​ប្រតិ​បត្ដិ​ការ​រវាង​ប្រទេស​ទាំង​ពីរ​យ៉ាង​រឹង​មាំ​ត​ទៅ​។ ក្នុង​រយៈ​ពីរ​បី​ឆ្នាំ​ចុង​ក្រោយ​​នេះ​ជំនួយ​របស់​ចិន​មាន​ប្រមាណ​ជិត​ ៧០០លាន​ដុល្លារ​ ២០០​លាន​សំរាប់​សាង​សង់​ស្ពាន​ពីរ​ ឆ្លង​កាត់​ទន្លេ​សាប និង ទន្លេ​មេ​កុង​លើ​។ ២០០ លាន​ដុល្លារ​ គឺ​ជាប្រាក់​កំចី​ និង ២០០​លាន​ដុល្លារ​ទៀត​ជា​ជំនួយ​អិត​ចំនង​។​

ថ្ងៃទី១១ មេសា បន្ទាប់​ពីស្ដេច​ឃុន​សេរី​វុឌ្ឍ ប្រកាស​លា​លែង​ពី​ដំណែង​កាល​ពី​ថ្ងៃ​ទី​៦ មេសា​មក សំដេចន​រោត្ដម វិជ្ជរ៉ា​បាន​​ប្រកាស​លា​លែង​ពី​ដំណែង​ក្រុម​ការ​ងារ​មណ្ឌល​ភ្នំ​ពេញ​ដែរ​។

ថ្ងៃទី១២ មេសា លោក​ហ៊ុន សែន​ក្នុង​សំសៀក​បំពាក់​ជា​កង​យោធា​បាន​ជូន​ដំណើរ​កង​យោធា​ដោះ​មីន​ខ្មែរ​ចំនួន​ ១៣៥​នាក់​ដែល​ជា​ក្រុម​យោធា​លើក​ដំបូង​ នឹង ត្រូវ​ធ្វើ​ដំណើរ​ទៅ​កាន់​ប្រទេស​ស៊ូដង់​ នៅ​ថ្ងៃ​ទី​១៥ មេសា​ខាង​មុខ​នេះ​ ក្នុង​ភារ​កិច្ច​ជា​ក្រុម​ដោះ​មីន​ក្នុង​រយ​ពេល​មួយ​ឆ្នាំ​តាម​សំនើ​របស់​អង្ការ​សហ​ប្រជា​ជាតិ​។​ លោក​ហ៊ុន សែន បាន​ផ្ដល់​អនុសាសន៍​ជា​ច្រើន​​ដល់​កង​យោធា​អោយ​ប្រព្រឹត្ដ​ប្រតិ​បត្ដិ​ខ្លួន​អោយ​បាន​ល្អ​ក្នុង​បេស​ក​កម្ម​របស់​ខ្លួន​ លោក​មាន​ប្រសាសន៍​ថា «ខ្ញុំ​សូម​បញ្ជាក់​ថា​ នាយ​ទាហាន​ នាយ​ទាហាន​រង​ និង ពល​ទាហាន​ដែល​ចេញ​ទៅ​ប្រតិ​បត្ដិ​ការ​ គឺ​មិន​មែន​ជា​ទាហាន​ឈ្លាន​ពាន​ មិន​មែន​​ជា​ទាហាន​ត្រួត​ត្រា​ ហើយ​ក៏​មិន​មែន​ជា​ទាហា​ស៊ី​ឈ្នួល​ដែរ​។»​

ថ្ងៃទី ១៨ មេសា ពិធី​បុណ្យ​ចូល​ឆ្នាំ​ខ្មែរ​ប្រព្រិត្ដ​ទៅ​ដោយ​ភាព​សប្បាយ​រីក​រាយ​ គួរ​ជា​ទី​ពេញ​ចិត្ដ​ប្រជា​នុ​រាស្រ្ដ​ខ្មែរ​គ្រប់​រូប​ គណ​បក្ស​ហ្វុន​ស៊ីន​ប៉ិច​ ដែល​កំពុង​តែ​ទទួល​ នូវ ភាព​តាន​តឹង​យ៉ាង​ខ្លាំង ​ក្នុង​ការ​ដក​ដំណែង​ពី​សមា​ជិក​រដ្ឋា​ភិបាល​របស់​ខ្លួន​ ថ្ងៃ​នេះ​អភិ​បាល​រង​ទី​ក្រុង​ភ្នំ​ពេញ​ចំនួន​៣​នាក់​ទៀត​ គឺ ព្រះ​អម្ចាស់ ស៊ីសុវត្ដិ ភានុ​រ័ត្ន, លោក​អួច​ថោង​ សេង​ និង លោក​ម៉ៅ​ យូ​រ៉ាន់​ត្រូវ​បាន​ដក​ហូត​ពី​មុខ​តំណែង​។ នៅ​ទី​ក្រុង​ព្យុង​យ៉ាង​ កូរេ​ខាង​ជើង​ ព្រះ​មហា​ក្សត្រ​ខ្មែរ​ នរោត្ដម សីហ​មុនី ត្រូវ​បាន​ទទួល​យ៉ាង​រាក់​ទាក់​ពី​សំនាក់​មេ​ដឹក​នាំ​កូរេ​ខាង​ជើង​ ព្រះ​អង្គ​បាន​យាង​ទៅ​ដល់​ពី​ម្សិល​មិញ​ក្នុង​ដំណើរ​ទស្សន​កិច្ច​ចំនួន​៣​ថ្ងៃ​។​

ថ្ងៃទី២០ មេសា គណ​ប្រតិ​ភូ​សភា​អឺ​រ៉ុប លោក​ម៉ាក តារា​បែលា​ អនុ​ប្រធាន​ទី​១ សំរាប់​ទំនាក់​ទំនង​បណ្ដា​ប្រ​ទេស​អាស៊ី​អា​គ្នេយ៍​ ដែល​បាន​អញ្ញើញ​មក​ដល់​ទី​ក្រុង​ភ្នំ​ពេញ​កាល​ពី​ម្សិល​មិញ​ ក្នុង​ដំណើរ​ទស្សន​កិច្ច​នៅ​កម្ពុជា​ចំនួន​មួយ​អាទិត្យ​ ដើម្បី​វាយ​តំលៃ​ ស្ថាន​ការ​គោរព​សិទ្ធ​មនុស្ស​នៅ​កម្ពុជា​ ថ្ងៃ​នេះ​លោក​បាន​ចូល​ធ្វើ​សវនា​ការ​ជា​មួយ​លោក​នាយក​រដ្ឋ​មន្រ្ដី​ហ៊ុន​សែន ហើយ​និង មាន​គំរោង​ការ​ជួប​ជា​មួយ​អង្គ​ការ​នានា​ មាន​អង្គ​ការ​សិទ្ធ​មនុស្ស​របស់​លោក​កឹម​ សុខា​ ជា​ដើម​ផង​។​

ថ្ងៃទី ២១ មេសា លោក​នាយក​រដ្ឋ​មន្រ្ដី​ហ៊ុន​ សែន ថ្លែង​បញ្ជាក់​យ៉ាង​ច្បាស់​ៗ​ថា កម្ពុជា នឹង មិន​បញ្ជូន​កង​ទ័ព​ទៅ​កាន់​ប្រទេ​ស​អៀ​រ៉ាក់​ទេ​ ទោះ​ជា​មាន​សំនើ​ទ្វេ​ភាគី​ ពហុ​ភាគី​ រឺ សំនើ​ពី​ អ.ស.ប ​ក៏​ដោយ​។ លោក​ថ្លែង​ថា​ ប្រ​ទេស​អៀ​រ៉ាក់​ពោរ​ពេញ​​ទៅ​ដោយ​ភ្លើង​សង្គ្រាម​ ឃើញ​តែ​មនុស្ស​ងាប់​ មនុស្ស​ចប់​ជំរិត​។​ ដូច្នេះ​ខ្ញុំ​មិន​អោយ​ពល​រដ្ឋ​កម្ពុជា​ ដែល​ជោគ​ជំ​ដោយ​​ការ​ឈឺ​ចាប់​រាប់​ឆ្នាំ​មក​ហើយ​នោះ​ ទទួល​ការ​លំបាក​វេទនា​ ព្រាត់​ប្រាស​និរាស​ដោយ​សារ​សង្រ្គាម​ ដែល​កំពុង​បន្ដ​នោះ​ទេ​។​កសូម​បញ្ជាក់​ថា​ កាល​ពី​ថ្ងៃ​ ១០​មេសា​នេះ​ អែក​អគ្គ​រដ្ឋ​ទូត​សហ​រដ្ឋ​អាមេ​រិក​ ប្រចាំ​នៅ​កម្ពុជា​ លោក ចូ​សេហ្វ មូសូ​មែលី ​Josehp Mussomeli បាន​ជួប​ស្នើ​ផ្ទល់​ជា​មួយ​លោក​នាយក​រដ្ឋ​មន្រ្ដី​ហ៊ុន សែន អំពី​លទ្ធ​ភាព​កម្ពុជា​ក្នុង​ការ​បញ្ជូន​កង​ទ័ព​ដែល​មិន​មែន​ជា​កំលាំង​ប្រយុទ្ធ​ទៅ​អៀ​រ៉ាក់​។​
ជា​មួយ​គ្នា​នេះដែរ​ គណ​រដ្ឋ​មន្រ្ដី​រដ្ឋ​សភា​ បើក​កិច្ច​ប្រជុំ​កែ​ប្រែ​ច្បាប់​បរិ​ហារ​កេរ​ ឈប់​អោយ​មាន​ទោស​ជាប់​គុក​ ដាក់​បញ្ជូន​ទៅ​កាន់​រដ្ឋ​សភា​ ដើម្បី​អនុម័ត​ច្បាប់​ អោយ​ចូល​ជា​ធរ​មាន​ក្នុង​ពេល​ឆាប់​ៗ​នេះ​។​

ថ្ងៃទី ២៣ មេសា ខុទ្ទការល័យ​សំដេច​នរោត្ដម សីហនុ បដិ​សេធ​ពាក្យ​ដែល​លេច​លឺ​ថា​ សំដេច​សី​ហនុ នឹង​ហក់​ចូល​មក​​ធ្វើ​នយោ​បាយ​វិញ​ ការ​បដិសេធ​នេះ​ ធ្វើ​ឡើង​ក្រោយ​ពី​មាន​សារ​ពត៌​មាន​នៅ​ក្នុង​ស្រុក​ជា​ច្រើន​បាន​ចុះ​ផ្សាយ​ថា​ ទ្រង់​រណរិទ្ធ​ នឹង លា​លែង​ពី​គណ​បក្ស​ហ្វុន​ស៊ីន​ប៉ិច ប្រគល់​ជូន​ទៅ​ស្ថាប​និក​ដើម​វិញ​ ហើយ​ព្រះ​អង្គ​ នឹង បង្កើត​គណ​បក្ស​ថ្មី​មួយ​ទៀត​​។

ថ្ងៃទី ២៦ មេសា លោកម៉ាក​ តារា​បែលា​ អនុ​ប្រធាន​ទី១​ នៃ​គណ​កម្ម​ការ​សភា​អឺរ៉ុប​ ទទួល​បន្ទុក​ទំនាក់​ទំនង​អាស៊ាន​ បាន​វាយ​តំលៃ​លិទ្ធិ​មនុស្ស​នៅ​កម្ពុជា​ផ្ទុយ​គ្នា​ស្រលះ​ ពី​លោក​យ៉ាស្ក​ហ្កាយ​ គណ​ប្រតិ​ភូអង្គ​ការ​សហ​ប្រជាតិ​ប្រចាំ​កម្ពុជា​ លោក​ម៉ាក តារា​បែលា​ថា ប្រទេស​កម្ពុជា​មាន​ស្ថិរ​ភាព​ និង កំពុង​មាន​ដំណើរ​ការ​តាម​លិទ្ធិ​ប្រជា​ធិប្ប​តេយ្យ​វិញ​ទេ​ លោក​និយាយ​កាល​ពី​ថ្ងៃ​ចន្ទ​ថា ខ្ញុំ​ជឿ​ថា​តំណាង​អង្ការ​សហ​ប្រជាតិ​មិន​បាន​វាយ​តំលៃ​សភាព​ការណ៍​ ដោយ​មិន​លំអៀង​ដូច​យើង​នោះ​បាន​​ឡើយ​។​

ថ្ងៃទី ២៧ ក្រុម​ហ៊ុន​ ផលិត​ខ្សែ​ភាព​យន្ដ​ថៃ NGR បាន​ធ្វើ​សន្និ​សិទ​កាសែត​មួយ​សូម​ទោស​ដល់​ប្រជា​ពល​រដ្ឋ​ខ្មែរ​ ក្រោយ​ពី​បាន​ថត​ខ្សែ​ភាព​យន្ដ​មួយ​ធ្វើ​អោយ​ប៉ះ​ពាល់​ ដល់​កិត្ដិ​យស​ និង សេច​ក្ដី​ថ្លៃ​ថ្នូរ​របស់​ប្រជា​ពល​រដ្ឋ​កម្ពុជា​ ខ្សែ​ភាព​យន្ដ​នោះ​មាន​ចំនង​ជើង​ថា​ ល្បែង​ខ្មោច​ Ghost Game ស្ថិត​នៅ​ក្នុង​សារ​មន្ទីរ​លេខ​១១​ ក្នុង​ប្រទេស​ហ្គេម​បូដេន Gamebodian​។​របៀប​ឆុត​ឆាក​តែង​រៀប​ចំ​ឡើង​ដូច​សារ​មន្ទីរ​ប្រ​លៃ​ពូជ​សាសន៍​ គុក​ទួល​ស្លែង​ ស​២១​ របស់​អតីត​របប​ខ្មែរ​ក្រហម​ ដែល​នៅ​ទី​នោះ​មាន​មនុស្ស​រាប់​ម៉ឺន​នាក់​ត្រូវ​គេ​ធ្វើ​ទារុណ​កម្ម​យ៉ាង​សាហាវ​បំផុត​។​