គុកកាមកិលេស
ដោយបណ្ឌិតសាស្ដ្រាចារ្យ
កេង វ៉ាន់សាក់
Prof.Dr. Keng Vannsak
ចំណាត់ផ្សាយលេខ
ថ្ងៃសៅរ៍ ទី16.មីនា 2019.ម៉ោង 8:10

គុក កណ្ដុរ និង ភ័យ
កេង វ៉ាន់សាក់
ល្ងាចនេះមហាមឃហាក់យំយែក បានភ្លៀងប្លែកដូចកំពប់
ឆរៗ ឈូៗ មិនឈរឈប់ទល់យប់នៅយំមិនស្រាកស្រាន្ដ។
ស្រឹបៗ ភ្នែកបង រលឹមព្រួយ យំជួយមហាមេឃ អោយសុខសាន្ដ
ឈឺចាប់មនុស្សលោកទាំងប៉ុន្មានលោកអើយអោយបានរលត់ទៅ។
ស្រឹបៗស្រមៃ ហាក់ឃើញអូន ស្ងាត់សូន្យក្នុងគុក ទុក្ខជ្រាលជ្រៅ
ត្រជាក់ស្រៀតស្រិត នឹកពាលពៅម៉្លេះសមអូននៅព្រួយអែកា។
យូរៗខ្យល់បក់សូរគ្រលួច តាមកូនបង្អួចហាក់ចរចា
ដង្ហោយហៅបង អោយសោកាពេលយើងប្រាថ្នាជាមួយគ្នា។
ស្រឹបៗទឹកភ្លៀងជោរជនព្រៀប ហាក់ហៀបលិចអស់វាលទីធ្លា
កណ្ដុរតូចមួយរងាកំព្រាហែលទឹកមករកបង។
ព្រោះអីលូទឹក លិចគ្មានសល់ ទឹកដល់កហើយគួរខំផ្សង
ហែលមករកទួល ជិតទ្វាររបងក្រែងទួលចម្លងផុតក្សិនក្ស័យ។
ឈ្លក់ទឹកក្នុងលូ យូរមកហើយ បើមិនចេញឡើយ ខានឃើញថ្ងៃ
ចេញចុះ! ក្រែងលោជីវិតថ្លៃបើក្ស័យគង់បាន ឃើញរស្មី។
កណ្ដុរហែលមកដល់ហើយ ដល់ត្រើយបានសុខបានសេរី
ស្រាប់តែឃើញបងគ្មានឃ្មាតខ្មីលោតផ្លោតចោលដីភ្លុងក្នុងទឹក។
នឹងចូលលូវិញស្លាប់ដដែល នឹងហែលមកទួលភ័យពន្លឹក
ខ្លាចមនុស្សចាប់ចង វាយវរវឹកមិនដឹងជានឹកហែលទៅណា។
មុជងើបមុជងើប ហែលទៅមក ហែលរកស្រោចស្រង់ជីវ៉ា
ផុតដៃផុតជើង ផុតប្រាថ្នាផ្កាប់ផ្ងារស្រវាអោបជីវិត។
ណ្នើយចុះត្រឡប់មកទួលវិញ បើយ៉ាងណាមិញក៏មិនពិត
ថាមនុស្សឃោរឃៅខំតែគិតប្រហារជីវិត សត្វដូចគ្នា។
លើទួលកណ្ដុររលាស់ខ្លួន ខំពួនធ្វើតូចដូចរងា
មើលលិចមើលកើតធ្វើហាក់ជាកំព្រាស្លូតណាស់សុំតែសុខ។
ធ្វើភ្នែកភ្លិះៗ អង្វរបង សូរអ្វីម្ដងៗ ធ្លាក់ថ្លើមក្ដុក
ភ្នែកនៅលើថ្ងាសត្បុលត្រសុកសំកុកចាំស្លាប់តាមវាសនា។
ជុំវិញទឹកភ្លៀងលលាមសាយ ជិតកាយមានមនុស្សចាំប្រហារ
ដង្ហើមផុតផើយរកស្រែកថា«លោកអើយមេត្ដាដល់ខ្ញុំផង!»។
ព្រិចៗទឹកភ្នែកកណ្ដុរយំ រងំជាមួយព្រួយប្រុសបង
មនុស្សសត្វ និង មេឃយំឆ្លើយឆ្លងយំផ្សងដូចគ្នាសុំតែសុខ។
ប្រសិនកណ្ដុរដឹងថាបង ជាប់ចងតឹងតែងរែងវិតក្ក
ប្រហែលកណ្ដុរអួលណែនចុករកសុខជិតបង បានជាគ្នា។
ក្នុងពេលខ្លីនេះឃើញ​អស់ហើយ អូនអើយប្រសិនកែវពុំងា
បានឃើញភ្នែកស្រស់អូនស្មារលាចងពៀរវេរាធ្វើបាបសត្វ។
ដូចមនុស្សលង់ទឹកខំប្រវា រកតោងទូកក្ដារណារសាត់
មនុស្សលោកគ្រប់គ្នាខំច្រវាត់ដូចសត្វចង់រស់ខ្លាចស្លាប់ណាស់។
ឈចាប់ភ័យខ្លាចព្រួយយំយែក ទឹកភ្នែកមនុស្សសត្វមានដេរដាស
ដូចគ្នាខំវៀររើបម្រះអោយប្រាសចាកទុក្ខបានសប្បាយ។
ទឹកភ្នែកកណ្ដុរជ្រាបដល់ថ្លើម ដល់ដួងដង្ហើមហើយសុសសាយ
អោយបងគិតដល់ភ័យទាំងឡាយភ័យជិតភ័យឆ្ងាយភ័យលោកា។
ភ័យភ្លើងឆេះផ្ទះភ័យលង់ទឹក ភ័យភ្លឹកភ័យស្រែកតោងប្រវា
បានព្រឹកខ្វហល្ងាចខ្វះអាហារកើតភ័យយ៉ាងណាភ័យអត់ឃ្លាន។
ភ័យខ្លាចចោរប្លន់ដុតចាប់ចង ភ័យរងដំបងវាយបំពាន
ភ័យឃើញគ្រប់បែកដុតរុករានទន្ទ្រានសំលាប់ក្មេងចាស់ស្រី។
ភ័យបាត់កូនទៅនៅតែម្ដាយ ខ្វល់ខ្វាយរលឹកនឹកបេតី
ភ័យញ័ររន្ធត់បាត់ស្មារតីភ័យបាតសេរីកាយនិងចិត្ដ។
ភ័យព្រាត់គូទៅនៅអែកអែង ភ័យក្រែងបានហើយមិនថេរឋិត
ផ្លាស់ប្ដូរហូរហែទាំងស្នេហ៍ស្និទ្ធប្ដូរកាយប្ដូរចិត្ដភ័យខ្លាចស្លាប់។
ស្លាប់ភ្លាមភ័យយាមយោងកំណើត ចង់កើតតទៀតឆ្លៀតប្រញាប់
រស់មែនបើក្រជាលំដាប់នោះរស់រឺស្លាប់ភ័ដូចគ្នា។
តែមនុស្សមិនព្រមស្លាប់សោះឡើយ អូនអើយស៊ូរស់ចាស់ជរា
ក្នុកខ្ទមភក់ជ្រាំទ្រាំវេទនាអោយតែការពារជីវិតបាន។
ប្រៀបដូចកណ្ដុរពួនក្នុងលូ មនុស្សលោកខំស៊ូពួនក្នុងប្រាណ
ក្នុងភ័យទុក្ខព្រួយទាំងប៉ុន្មានរួចសឹមចង់បានសុខសប្បាយ។
ភ័យកើតឡើតទៀតតាមប្រាថ្នា បានហើយសង្កាភ័យសោកស្ដាយ
ភ័យរស់ភ័យស្លាប់លលាមសាយភ័យបាំងសប្បាយឃើញព្រឹមៗ។
អស់ឱទឹកភ្នែកអ្នកភ្លៀងមក ហូរយកទុក្ខភ័យទៅរលឹម
ស្រឹបៗរលត់បានញញឹមសង្ឃឹមពិតមែនតែថ្ងៃក្រោយ។
ភ្លៀងមកអស់អោមហាមេឃា ភ្លៀងជាស្នេហាហូរអំណោយ
មកស្រាយស្រោចស្រង់ក្រខ្សត់ខ្សោយភ្លៀងអោយរលាយភ័យមនុស្សលោក។
((((((((((((((((((((((((((((((((((((((((((Prof.Dr. Keng Vannsak))))))))))))))))))))))))))))))))))))))))))
គុក កម្មទំលាប់
បញ្ហាអតីតកាល
ព្រលឹងមាសអើយយូរថ្ងៃណាស់ហើយជញ្ជាំងជុំជិត
បងនៅរងទុក្ខក្នុងគុកងងឹតហេតុនាំអោយគិត
តែពីខ្លួនអែង។
អិតជួបអ្នកណាខានស្ដាប់វាចានៅមួយកន្លែង
ដាច់ពីមនុស្សលោកវិយោគចំបែងឃើញតែខ្លួនអែង
គួរអោយខ្លាចណាស់។
ឈាមហូររសឹបសរសៃប្រឹបៗជីពចររហ័ស
ស្រេកឃ្លានគ្រប់មុខសុខទុក្ខជាន់ចាស់សោកស្ដាយព្រាត់ប្រាស
អន្ទោលតាមបង។
ចិត្ដចង់ចងចាំរស់ជាផលកម្មអង្គុយសាកសង
សាកសួរក្នុងគុកទល់មុខប្រុសបងជាប់ពីរចំណង
គុក និង អាត្មា។
ជាប់គុករួចបានជាប់នឹងខ្លួនប្រាណលុះអស់សង្ខារ
ខ្លួនតាមខ្លួនជាប់ទំលាប់យ៉ាងណាអែអង្គអាត្មា
ក៏យ៉ាងនោះដែរ។
អណ្ដាតជាប់ឆ្ងាញ់ចិត្ដជាប់ស្រលាញ់ធ្លាប់ជាប់ហូរហែ
ដៃជាប់អង្អែលជាប់ក្អែលជាស្លែដឹងហើយប៉ុន្ដែ
រកដោះពុំបាន។ ៤០
ត្រចៀកធ្លាប់ស្ដាប់ភ្លេងភ្លាត់សូរស័ព្ទអូនសើចកំសាន្ដ
ក្លិនជាប់ចងខ្លុះច្រមុះតាមដានពិដោរភុំផាន
ក្រអូបក្រាស់ក្រៃ។
ភ្នែកធ្លាប់ក្របយករូបរាងពន្លកព្លឺថ្លើមថ្លៃ
ទន់ភ្លន់ស្រៀវស្រើបសំរើបយប់ថ្ងៃស្រៀវស្រួលស្រមៃ
ឃើញតែស្រីស្រស់។
មាត់ធ្លាប់និយាយជជែករៀបរាយរើសរកសេចក្ដី
រឺធ្លាប់ថើបធួនបំពួនបេតីបំពេរអូនស្រី
ថាបងស្នេហា។
ធ្លាប់គគូរធ្លាប់គិតធ្លាប់ប្ដូរគំនិតដោះស្រាយបញ្ហា
ដោះតាមបំណងប៉ុនប៉ងលោកាបានតាមស្នេហា
គូគាប់ពីរនាក់។
ធ្លាប់ឃើញគ្នីគ្នាជិតឆ្ងាយមកជាសំលាញ់មិត្ដភក្ដិ
ធ្លាប់ឃើញកម្មករអូរអររាក់ទាក់ធ្លាប់ឃើញពីរនាក់
បងស្នេហ៍អូនស្និទ្ធ។
អីលូវអូនអើយទំលាប់នេះហើយតាមបងប្រកិត
ដូចជាស្រមោលអន្ទោលតាមស្អិតជាប់កាយជាប់ចិត្ដ
ជាប់ពេញទាំងខ្លួន។
ឆ្ងាញ់ជាប់អណ្ដាតបាយគុកប្រហាតនាំអោយរុកគួន
រើករកយប់ថ្ងៃស្នាដៃនឹមនួនឆ្ងាញ់នៅពេញខ្លួន
មិនឆ្អែតសោះឡើយ។
ដៃនៅអង្អែលស្ទាបទៅប្រហែលហាក់បះពូកខ្នើយ
ពិតមែនតែក្ដារមិនថាសោះឡើយអោយតែបានស្បើយ
ទំលាប់ធ្លាប់ចង់។
ម្នាក់អែងស្ងាត់ឈឹងក៏នៅរំពឹងស្ដាប់តាមចំណង់
លឺសូរសំដីស្រស់ស្រីផូរផង់ស្រួចស្រើបចិត្ដចង់
ចងជាប់កាមា។
ឃើញមានជញ្ជាំងតែមិនបិទបាំងរូបរាងកនិដ្ឋា
ស្រលូនដូចម្ដេចបងធ្មេចស្រវាអោមមែនបះក្ដារ
ក៏អោបតាមធ្លាប់។
និយាយម្នាក់អែងទៅនឹងកំពែងតេហាក់គូកាប់
បំពេរឆ្លងឆ្លើយអោយស្បើយអភ័ព្វបាត់ចង់បាត់ជាប់
គុកធ្លាប់ស្រលាញ់។
ធុំហើយក្លិនគុកឆ្អេះឆ្អាប់គ្រប់មុខតែធ្លាប់ធុំឆ្ងាញ់
ពិដោរកនិដ្ឋាស្រវាខ្មួលខ្មាញ់នឹកឡើងគ្នាន់កក្នាញ់
ធុំចង់ថើបអូន។
ស្ងាត់ណាស់គិតណាស់ចិត្ដហូរប្ដូរផ្លាស់គិតពេញសំនួន
ស៊ូជួបជុំមិត្ដមិនគិតជាប់ជួនបើជួបតែខ្លួន
គិតមិនឈរឈប់។
ទំលាប់អស់នេះអូនអើយមិនចេះស្រាកស្រាន្ដរលប់
ធ្លាប់ចិត្ដធ្លាប់សាច់មិនបាច់ថ្ងៃយប់ធ្លាប់នៅសន្ធាប់
ក្នុងគុកអាត្មា។
ឱអូនពុំងាយើងជាប់គ្រប់គ្នាក្នុងគុកតណ្ហា
គុកបងពីរជាន់នៅវ័ណ្ដវាសនាតែគុកអាត្មា
គេមានសេរី។
គេចង់ទៅណាលោតលេងស្នេហាបានតាមគប្បី
គុកផងខ្លួនផងគុកបងអប្រិយជាប់អិតសេរី
ផ្កាប់ធ្លាប់បានហើយ។
ចង់ហើយបានភ្លាមឆ្អែតហើយសាច់ឈាមធ្លាប់បានធូរស្បើយ
នាំអោយលង់លក់ទ្រមក់កន្ដើយមិនដឹងខ្លួនឡើយ
ថាជាប់ខ្លួនអែង។
ចង់ហើយមិនបានសាច់មិនសុខសាន្ដចិត្ដអែងចំបែង
ទប់ជាប់ធ្លាប់ប្រឹងតេដឹងខ្លយនអែងថាជាប់កំពែង
គុកគប់អាត្មា។
ប្រសិនទំលាប់ចង់ភ្លែតយើងផ្គាប់ចំណីអាហារ
ឆ្អែតមែនសាច់ឈាមឆ្អែតភ្លាមកាលណាកាលនោះតណ្ហា
ចង់កាន់តែខ្លាំង។
បើយើងបង្អត់ទំលាប់ខ្សោយខ្សត់លើកគ្នាមកច្បាំង
រុករានខ្លាំងឡើងហើយយើងតតាំងធ្លាប់ខ្សោយកំលាំង
តែមិនរលប់។
ហេតុនេះបានជាក្រពះគ្រប់គ្នាស៊ីជុះមិនឈប់
បានស៊ីនៅឃ្លានបើគ្មានខំទប់ឃ្លានធ្លាយទំនុក
ខាងណាពុំបាន។
បើចង់កំចាត់ទំលាប់អោយបាត់ត្រូវធ្វើអោយបាន
ទំលាប់មួយទៀតទើមឆ្លៀតប្រែប្រាណប្រែអោយសុខសាន្ដ
បានដោយដឹងខ្លួន។
មានចុះទំលាប់តែត្រូវយើងធ្លាប់តាំងចិត្ដមាំមួន
ទប់ឬបណ្ដោយធ្លាប់អោយសមសួនធ្វើជាម្ចាស់ខ្លួន
ដឹកនាំវាសនា។
កំពែងទំលាប់ច្រើនហើយសែនជាប់ព្រោះជាសង្ខារ
កើតតាមភក្ដីមេត្រីអាត្មារួចបានថ្ងៃណា
ថ្ងៃនោះនិព្វាន។
((((((((((((((((((((((((((((((((((((((((((Prof.Dr. Keng Vannsak))))))))))))))))))))))))))))))))))))))))))

គុកាមកិលេស(តវគ្គ5)