មហាសង្ក្រាន្ដឆ្នាំមមែសប្ដស័ក ចត្វាស័ក
ពស២៥៥៩ គស ២០១៥
មហាសករាជ ១៩៣៧ ចុល្លសករាជ ១៣៧៧
ដោយឯកឧត្ដម អ៊ិម បុរិន្ទ
ថ្ងៃសៅរ៍ ទី11.មេសា 2015.ម៉ោង 8:35
_______________________________________
សួស្ដីឆ្នាំថ្មី ឆ្នាំមមែសប្ដស័ក
ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំមមែសប្ដស័ក ពុទ្ធសករាជ ២៥៥៩ ចុល្លសករាជ ១៣៧៧ មហាសករាជ ១៩៣៧ គ្រឹស្ដសករាជ ២០១៥នេះ មណ្ឌលវប្បធម៌ខ្មែរនៅស្វីស សូមគោរពជូនពរ បវរសេរីសួស្ដីមហាប្រសើរ ប្រគេនថ្វាយ និងជូនចំពោះព្រះថេរានុថេរ លោក លោកស្រី និង ប្រជានុរាស្រ្ដគ្រប់ជាន់ថ្នាក់ គ្រប់ទិសទី ក្នុងពិភពលោក សូមទេវតាឆ្នាំថ្មី ជួយគ្រប់គ្រងបីបាច់រក្សា សូមអោយមានអាយុយឺន ផុតចាករោគាពេទ្យទាំងឡាយ សូមប្រកបដោយសេចក្ដីសុខដុមរម្យនា សូមអោយមានចិត្ដជាកុសល សន្ដោសត្រាប្រណី យោគយល់គ្នា សាមគ្គីរួមសុខទុក្ខ ជាមហាគ្រសារតែមួយ នៅលើទឹកដីមាតុភូមិជាទីស្នេហា សូមអោយមានកំលាំង កាយនិងកំលាំងប្រាជ្ញាបរិបូណ៌ សូមមានសទ្ធាជ្រះថ្លាក្នុងព្រះ ពុទ្ធសាសនា សូមអោយមានយុត្ដិធម៌ សុខសន្ដិភាពជាជានិច្ចតរៀងទៅ។
[សារជូនពរលោកប្រធានត្រា ស៊ីន ប្រធានមណ្ឌលវប្បធម៌ខ្មែរនៅស្វីស]
មហាសង្ក្រាន្ដឆ្នាំមមែ បស្ដស័ក
ចុល្លសករាជ ១៣៧៧ មហាសករាជ ១៩៣៧
ពុទ្ធសករាជ២៥៥៩ គ្រឹស្ដសករាជ ២០១៥
សុភមស្ដុ វរមង្គលាជយាតិរេក
ព្រះពុទ្ធសករាជព្រះសាសនា អតិក្កន្តា កន្លងទៅហើយបាន ២៥៥៨ ព្រះវស្សាត្រឹមថ្ងៃពេញបូណមី១៥កើត ខែពិសាខ លុះដល់ថ្ងៃ ១រោច ខែពិសាខ ឆ្នាំមមែសប្ដស័ក តទៅចូលពុទ្ធសករាជ ២៥៥៩។
នឹងគណនាឆ្នាំមមែ ឥឡូវនេះ សង្ក្រាន្តចូលមកនៅថ្ងៃអង្គារ ១១រោច ខែចេត្រ ត្រូវនឹង ថ្ងៃទី១៤ ខែមេសា គ.ស២០១៥ វេលាម៉ោង១៤ និង ០២នាទី។ ពេលនោះព្រះអាទិត្យចេញពីមីនរាសី ទៅឋិតនៅឯមេសរាសី តាមផ្លូវគោវិថី គឺផ្លូវកណ្ដាល ទើបមានទេពធីតាមួយព្រះអង្គ ជាមគ្គនាយិកាព្រះនាម រាគ្យសទេវី ជាបុត្រីទី៣ នៃកបិលមហាព្រហ្ម គង់នៅចាតុម្មហារាជិកាទ្រង់អម្ពរពណ៌ខ្មៅ លំអនៅព្រះកាណ៌ដោយសៀតផ្កាឈូក អភរណៈ ទ្រង់ពាក់កែវ មនោរា ភក្សាហារទ្រង់សោយលោហិត ព្រះហស្ថស្តាំទ្រង់ គ្រីសូល៍ ព្រហស្ដឆ្វេងទ្រង់ធ្នូ គង់លើខ្នង អស្សតរ (សេះ) ជាពាហនៈ។ ទើបនាំអស់ ទេវបុត្រទេវធិតាទាំងមួយសែនកោដិ ហោះទៅកាន់គុហារកែវធម្មមាលី នាទីភ្នំកៃលាសខេត្ត ហេមពាន្ត ជាទីតំកល់ទុកនូវព្រះសិរសាកបិលមហាព្រហ្ម ដែលតំកល់លើពានមាស នាំមកដង្ហែប្រទក្សិណ ភ្នំព្រះសុមេរុរាជ តាមផ្លូវព្រះអាទិត្យចរចំនួន៦០ នាទី (២៤ម៉ោង)។ ទើបនាំយកទៅតំកល់ទុកកន្លែងដើមវិញ ហើយប្រជុំទេវបុត្រ ទេវធីតាទាំងមួយសែនកោដិ ចូលទៅស្រង់ទឹកអនោតត្តមហាស្រះ ដែលមានទឹកហូរចេញពីបំពង់ថ្មកែវ ដែលជាមាត់គោឧសភរាជ ទាំង៧ ត្រជាក់ក្សេមក្សាន្តព្រះរាជហរិទ័យ ហើយនាំគ្នាចូលទៅសមាទានរក្សាសីល ដោយសោមនស្សរីករាយគ្រប់ព្រះអង្គ ក្នុងភគវតីសភាសាលា ដែលវិស្សកម្មទេវបុត្រនិមិត្តថ្វាយ ដើម្បីបន្ទោបង់នូវអពមង្គល អោយជ្រះស្រលះ ហើយចំរើននូវសិរីសួស្តីជ័យមង្គលជន្មាយុយឺនយូរ ដល់ទេវតានិងមនុស្សសត្វផងទាំងឡាយ តាំងពីឆ្នាំថ្មីចូលមកនេះ បានធូរទូលំទូលាយសុខក្សេមក្សាន្តតរៀងទៅ ។
- ថ្ងៃអង្គារ ១១រោច ខែចេត្រ ត្រូវនឹង ថ្ងៃទី១៤ ខែមេសា គ្រិស្តសករាជ ២០១៥ វេលាម៉ោង១៤ និង ០២នាទី ជាថ្ងៃចូលឆ្នាំមមែសប្ដស័ក (ជាថ្ងៃមហាសង្គ្រាន្ដ)។
- ថ្ងៃពុធ ១២រោច ខែចេត្រ ត្រូវនឹងថ្ងៃទី១៥ ខែមេសា គ្រិស្តករាជ ២០១៥ ជាវារៈវនបត ។
- ថ្ងៃព្រហស្បតិ៍ ១៣រោច ខែចេត្រ ត្រូវនឹង ថ្ងៃទី១៦ ខែមេសា គ្រិស្តសករាជ ២០១៥ នៅវេលាម៉ោង ១៨ និង ២១នាទី ៣៦វិនាទី ជាវារៈឡើងស័ក គំរប់ជាសង្ក្រាន្តបីថ្ងៃ ស្រេចបរិបូណ៌ ចូលជា សកល ឆ្នាំមមែសប្ដស័កតរៀងទៅ។
ក្នុងឱកាសសង្ក្រាន្តទាំងបីថ្ងៃនេះ សូមអស់ជនានុជនប្រុសស្រីទាំងឡាយ រៀបចំគ្រឿងសក្ការបូជា មានទៀនធូប ផ្កាភ្ញី ថ្វាយព្រះរតនត្រ័យ និង នំចំណីមានផ្លែឈើជាដើម ជូនមាតាបិតាអាណាព្យាបាលបុព្វការី ព្រមទាំងទទួលស្វាគមន៍ទេវតាឆ្នាំថ្មី ហើយខំលះបង់នូវចិត្តអាក្រក់ ជាចិត្តប្រកបដោយ អភិជ្ឈា ព្យាបាទ មិច្ឆាទិដ្ឋិ អោយស្រលះ ចំរើនឡើងវិញនូវចិត្ដប្រកបដោយបញ្ញា និងព្រហ្មវិហារធម៌ គឺមេត្តា ករុណា មុទិតា ឧបេក្ខា ធ្វើបុណ្យសន្ទរ៍ទាន រក្សាសីលតាមប្រពៃណីអោយបានជាប់ជានិច្ច នោះទើបទេព្តា នឹងអោយពរសព្ទសាធុការ លោកអ្នក នឹងមានសិរីសួស្តីសុភមង្គល វិបុលសុខគ្រប់ប្រការ ប្រកបការងារបានត្រជាក់ត្រជុំ អាយុយឺនយូរតរៀងទៅ។
រណ្តាប់ទទួលទេវតា
រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយសម្រាប់ តាំងគ្រឿងពលីការផ្សេងៗ។ ត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការបូជាទេវតា មានជាអាទិ៍ បាយសី ៩ថ្នាក់មួយគូ បាយសី៧ថ្នាក់មួយគូ បាយសី៥ថ្នាក់មួយគូ បាយសី៣ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ (ទៀន៥ ធូប៥) លាច៥ ផ្កា៥ដាក់លើជើងពាន១គូ ចេកនួន ចេកណាំវ៉ា ជើងពានមួយគូ ផ្លែឈើ១១មុខ រៀបដាក់ជើងពាន១១គូ ដូងឡៅមួយគូ ទឹកស្អាតពីរកែវ។ ស្រេចហើយនៅវេលាម៉ោងដែលទេវតាចុះមក ត្រូវជួបជុំក្រុមគ្រួសារដើម្បីថ្វាយបង្គំព្រះ នមស្ការព្រះរតនត្រ័យ សមាទានសីល ហើយតាំងចិត្តឱ្យបានស្អាតបរិសុទ្ធ ជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើ ព្រះពុទ្ធ ព្រះធម៌ ព្រះសង្ឃ ជាទីពឹង ទីរឭកលុះចប់ពិធីទទួលទេវតា ។
ចំពោះបាយសី៩ថ្នាក់ ៧ថ្នាក់ តំណាងឱ្យព្រះរាជា ព្រះបរមរាជវាំង ចំពោះប្រជារាស្ត្រគួរធ្វើត្រឹម៥ថ្នាក់ចុះមក ឬរៀបត្រឹមគ្រឿងសក្ការបូជាដែលមានទៀនប្រាំ ធូបប្រាំ ស្លាធម៌កូនចេកមួយគូក៏ល្អដែរ ។ ចំពោះផ្លែឈើសម្រាប់ប្រជារាស្ត្រ គួររៀបឱ្យបានត្រឹម៣ឬ៥មុខជាការប្រសើរ គឺរៀបទៅតាមធនធានរបស់ខ្លួន ។ នៅគ្រប់តង្វាយទាំងអស់ ត្រូវដាក់ផ្កាម្លិះភួងពីលើគ្រប់តង្វាយនៅលើជើងពាន និងលើបាយសីត្រូវដោតទៀនហើយដុតបំភ្លឺ ។
ទំនាយប្រចាំឆ្នាំ
- កេណ្ឌព្រះពិរុណសាស្ត្រ : ឆ្នាំនេះ ភពអាទិត្យជាធិបតិ ដឹកនាំផ្លូវទៅសុំទឹកភ្លៀងពីស្ដេចនាគ ហើយបាននាគ ៣បង្អុរភ្លៀង ៤០០មេដែលចែកចេញជា៖
- - ចក្រវាឡ ១៦០មេ
- - ព្រៃហេមពាន្ដ ១២០មេ
- - មហាសមុទ្រ ៨០មេ
- - និងជម្ពូទ្វីប មនុស្សលោកយើងមានចំនួន ៤០មេបណ្ដាលអោយមានទឹកភ្លៀងនៅដើមឆ្នាំ កណ្ដាល និងចុងឆ្នាំភ្លៀងស្មើល្អ។
កេណ្ឌធារាទិគុណ : ឆ្នាំនេះមានកេណ្ឌ(១) ត្រូវត្រង់តេជោធាតុចុះ ទំនាយថាភ្លើងកាចសាហាវជាងឆ្នាំកន្លង។
ទំនាយទឹកទន្លេ : ឆ្នាំនេះទំនាយអំពីទឹកទន្លេមានសំណល់៨ ទំនាយថា ទឹកទន្លេមានជាមធ្យម មិនធំមិនតូច។
កេណ្ឌធញ្ញហារ : ឆ្នាំនេះមានកេណ្ឌ (៣) មានឈ្មោះមជ្ឈិមា ទំនាយថា ស្រូវដំណាំស្រែចំការនិងបានផលពាក់កណ្ដាលខូចខាតអស់ពាក់កណ្ដាល ភោជានាហារបានផលជាមធ្យម។ ប្រជានុរាស្ដ្រមានសេចក្ដីសុខខ្លះទុក្ខខ្លះស្មើគ្នា។
ទំនាយការធ្វើស្រែ : ទំនាយកេណ្ឌការធ្វើស្រែមានសេស (២) ទំនាយថា ស្រែដីទំនាបនិងស្រែដីទួលបានផលល្អដូចគ្នាទាំងពីរយ៉ាង។
កេណ្ឌព្រឹក្សា : ឆ្នាំនេះត្រូវចំសេស២ ត្រូវត្រង់ដើមល្វា ជាស្ដេចមានទំនាយថា មនុស្សផងទាំងឡាយមានសេចក្ដីសុខក្សេមក្សាន្ដ។
កេណ្ឌព្រះអាទិត្យ : ឆ្នាំនេះព្រះអាទិត្យធ្វើដំណើរដោយជិះដំរី ទំនាយថា ភ្លើងកាចសាហាវ ស្រុកនាមនាគធ្វើយុទ្ធសង្គ្រាម និងស្រុកនាមគ្រុឌ និងនាមកណ្ដុរ។
ទំនាយថ្ងៃបុណ្យអុំទូកនៅវេទិកាអុំទូក :
ថ្ងៃបុណ្យអុំទូកថ្ងៃទី ៥វិច្ឆកា ឆ្នាំ២០១៤ ជាថ្ងៃទី១ ចាប់ពីម៉ោង១២ និង ១៥នាទីថ្ងៃត្រង់មានភ្លៀងខ្លាំង និងមានផ្គរលាន់។ ថ្ងៃទី ៦វិច្ឆកាជាថ្ងៃទី២ មេឃមីរស្រទុំមានពពកច្រើន ទាល់ល្ងាច។ ថ្ងៃទី ៧ វិច្ឆកាជាថ្ងៃទី៣ ធាតុអាកាសក្ដៅខ្លាំងណាស់ មេឃស្រឡះល្អមិនមានខ្យល់ភ្លៀងឡើយ។
ទំនាយតាមថ្ងៃសង្ក្រាន្ត
ទំនាយថ្ងៃមហាសង្ក្រាន្ត ៖ ថ្ងៃចូលឆ្នាំដែលជាថ្ងៃទី១ត្រូវនឹងថ្ងៃ អង្គារ ទំនាយថា ឆ្នាំនេះនឹងកើតអន្ដរាយកណ្ដាលទីក្រុងនូវភ្លើងឆេះយ៉ាងសាហាវ កើតនូវចោរចិត្ដកាចច្រើនឡើង មនុស្សនិងប្រែជាមានចិត្ដអាក្រក់ ហើយមានជំងឺដំកាត់ច្រើនជាទីបំផុត។ មនុស្សផងទាំងឡាយ នឹងកើតទុក្ខសោករោគភ័យ ស្លាប់ព្រោះជំងឺ និងព្រោះមានកល្លិយុគសង្គ្រាមច្បាំងគ្នា។ ផែនដីនឹងស្ងួតហួតហែង។
ទំនាយថ្ងៃវ័នបត ៖ ថ្ងៃកណ្តាលត្រូវនឹងថ្ងៃពុធ ទំនាយថា ឆ្នាំនេះស្រូវអង្ករផ្លែឈើមានតំលៃខ្ពស់ មនុស្សផងទាំងឡាយត្រូវក្ដៅក្រហាយចិត្ដជាច្រើន ស្ដ្រីទាំងឡាយ នឹងត្រូវនិរាសព្រាត់ប្រាសពីទីកន្លែងទៅរស់នៅទីដទៃផ្សេង។
ទំនាយថ្ងៃឡើងស័ក ៖ ថ្ងៃចុងក្រោយត្រូវនឹងថ្ងៃ ព្រហស្ពតិ៍ ទំនាយថា ឆ្នាំនេះសមណព្រាហ្មាចារ្យ នឹងប្រណិបត្ដិចូលចិត្ដដោយធម៌ដែលប្រសើរវិសេស។
កំណត់ប្រតិទិន
ឆ្នាំនេះជាឆ្នាំអធិកមាសប្រក្រតីវារៈ ប្រក្រតីសុទិន។ ខែចន្ទគតិចំនួន១៣ខែ ថ្ងៃក្នុងឆ្នាំចន្ទគតិមានចំនួន ៣៨៤ថ្ងៃ។ ថ្ងៃក្នុងឆ្នាំសុរយគតិមានចំនួន ៣៦៥ថ្ងៃ។ ខែកុម្ភ ក្នុងឆ្នាំ ២០១៦ មានចំនួន ២៩ថ្ងៃ។
ចូលព្រះវស្សានៅថ្ងៃសុក្រ ១រោចខែទុតិយាសាឍ ត្រូវនឹងថ្ងៃទី ៣១ខែកក្កដា គ.ស ២០១៥ ជាវារៈ ចូឡាធិកមានរិក្ស ២០តិថី១៥ ជាកាលវស្សានរដូវត្រូវតាមគន្លងប្រពៃណីបុរាណដែលមានព្រះអាទិត្យ ព្រះចន្ទតាមចក្ររាសីជាប្រធានអោយបានដឹងកំនត់ទ្វាទសមាស ទើបធ្វើការសារពើ បានចំរើននូវសេរីសួស្ដីមហាជ័យមង្គលបរិបូណ៌ហោង។
- ថ្ងៃបុណ្យភ្ជុំបិណ្ឌនៅថ្ងៃច័ន្ទ ១៥រោច ខែភទ្របទ ព.ស ២៥៥៩ ត្រូវនឹងថ្ងៃទី ១២ ខែតុលា គ.ស២០១៥ (ថ្ងៃ ១១, ១២, ១៣ ខែតុលា ២០១៥)។
- ថ្ងៃចេញវស្សា : នៅថ្ងៃអង្គារ ១៥កើត ខែអស្សុជ ព.ស ២៥៥៩ ត្រូវនឹងថ្ងៃទី ២៧ ខែតុលា គ.ស ២០១៥។
- ថ្ងៃពុធ ១រោច ខែអស្សុជ ព.ស ២៥៥៩ ត្រូវនឹងថ្ងៃទី ២៨ តុលា ២០១៥ ចាប់ផ្ដើមកឋិនកាលរហូតដល់ថ្ងៃ ១៥កើត ខែកក្ដិក ត្រូវនឹងថ្ងៃទី ២៥វិច្ឆិកា ២០១៥ ចប់កឋិនកាល។
- ថ្ងៃព្រះរាជពិធីបុណ្យអុំទូក : នៅថ្ងៃពុធ ១៥កើតខែកត្ដិក ព.ស ២៥៥៩ ត្រូវនឹងថ្ងៃទី ២៥ ខែវិច្ឆកា គ.ស ២០១៥ (ថ្ងៃ ២៤, ២៥, ២៦)។
អំពីកាលយោគប្រចាំឆ្នាំ ១៣៧៦ រិក្សនៃថ្ងៃខែ
កេណ្ឌ | ថ្ងៃ | ខែ | យាមឬវេលាពីម៉ោង | តិថី | រិក្ស |
ស្ដេច | ចន្ទ | កត្ដិក | ១០ម៉៣១ - ១២ម៉០០ និង ២២ម៉៣១ - ២៤ម៉០០ | ២០ | ២ |
អធិបតី | អាទិត្យ | មាឃ | ០៩ម៉០១ - ១០ម៉៣០ និង ២១ម៉០១ - ២៤ម៉៣០ | ២៣ | ២០ |
ឧត្បាត | សៅរ៍ | បុស្ស | ០៧ម៉៣១ - ០៩ម៉០០ និង ១៩ម៉៣១ - ២១ម៉០០ | ១៩ | ២២ |
ឃ្លប | ពុធ | ផល្គុណ | ១៦ម៉៣១ - ១៨ម៉៣០ និង ០៤ម៉៣១ - ០៦ម៉០០ | ១២ | ៦ |
អំពីកាលយោគប្រចាំឆ្នាំ ១៣៧៧ រិក្សនៃថ្ងៃខែ
កេណ្ឌ | ថ្ងៃ | ខែ | យាមឬវេលាពីម៉ោង | តិថី | រិក្ស |
ស្ដេច | អង្គារ | ស្រាពណ៍ | ១២ម៉០១ - ១៣ម៉៣០ និង ២៤ម៉០១ - ០១ម៉៣០ | ២១ | ៣ |
អធិបតី | ពុធ | ស្រាពណ៍ | ១២ម៉០១ - ១៣ម៉៣០ និង ២៤ម៉០១ - ០១ម៉៣០ | ៣ | ៣ |
ឧត្បាត | អង្គារ | អាសាឍ | ១០ម៉៣១ - ១២ម៉០០ និង ២២ម៉៣១ - ២៤ម៉០០ | ២ | ២ |
ឃ្លប | ព្រហៈ | មិគសិរ | ០៦ម៉០១ - ០៧ម៉៣០ និង ១៨ម៉០១ - ១៩ម៉៣០ | ៧ | ១៣ |
របៀបប្រើប្រាស់កាលយោគប្រចាំឆ្នាំ
ចាប់ពីថ្ងៃឡើងស័ក ច.ស ១៣៣៧ តទភរាល់ថ្ងៃ អង្គារជាស្ដេច រហូតដល់ថ្ងៃវ័នបតនៃឆ្នាំថ្មី ចុ.ស ១៣៧៨ ។ សំរាប់តិថី ២១ គឺស្ដេចគ្រប់ទាំង ១២ខែ សំរាប់រិក្សក៏ដូចគ្នា សំរាប់យាមគឺចាប់ពីម៉ោង ១២ម៉០១ ដល់ ១៣ម៉៣០ នេង ២៤ម៉០១ ដល់ម៉ោង ០១ម៉៣០ រៀងរាល់ថ្ងៃគឺជា យាមស្ដេច។ ចំពោះនិយាមផ្សេងៗ ទៀតអនុលោមតាមនេះចុះ។ ចាប់ពីខែមករា ២០១៥ ដល់ថ្ងៃ ១៥មេសានៅប្រើកាលយោគឆ្នាំចាស់ គឺឆ្នាំ ចុ.ស ១៣៧៦ ដដែល។
ថ្ងៃកាលយោគជាស្ដេច និងថ្ងៃអធិបតី ជាថ្ងៃជ័យមង្គលការប្រារព្ធពិធីមង្គលបានល្អគ្រប់ប្រភេទ។ ថ្ងៃកាលយោគជាឧត្បាទ ថ្ងៃឃ្លុប ជាថ្ងៃអពមង្គលហាមការប្រារព្ធពិធីទាំងពួងបើធ្វើការមង្គលទាំងឡាយ មានអន្ដរាយមិនល្អឡើយ។
បាតុភូតលើផ្ទៃមេឃ
នៅក្នុងឆ្នាំ ២០១៥នេះមានគ្រាសចំនួន ៤ដង ដែលសូរ្យគ្រាសមាន ២ដង និងចន្ទគ្រាស ២ដង តាមកាលបរិច្ឆេទដូចខាងក្រោម៖
១ -នៅថ្ងៃសុក្រ ១កើត ខែចេត្រឆ្នាំមមីឆស័ក ចុល្លសករាជ ១៣៧៦ ត្រូវនឹងថ្ងៃទី ២០ ខែមិនា ឆ្នាំ២០១៥ មានសូរ្យគ្រាស ជាសារពើគ្រាស (Total Eclipse of the Sun) មើលឃើញអៀកឡង់ អឺរ៉ុប អាស៊ីខាងជើង និងអាហ្វ្រិកខាងជើង ចាប់ផ្ដើមពីម៉ោង ១៤ម៉៤១ ដល់ម៉ោង ១៨ម៉៥០ ជាសារពើគ្រាស ពីម៉ោង ១៦ម៉១០ ដល់ម៉ោង ១៧ម៉២២ នាទី។ នៅប្រទេសកម្ពុជាយើងមើលមិនឃើញទេ។
ព្រះអាទិត្យរះម៉ោង ៦ម៉០៥ នាទី លិចម៉ោង ១៨ម៉១១ នាទី ព្រះចន្ទរះ ០៥ម៉៤៤នាទី លិច ១៨ម៉១០នាទី
២ -នៅថ្ងៃសៅរ៍ ១រោច ខែចេត្រ ឆ្នាំមមីឆស័ក ចុល្លសករាជ ១៣៧៦ ត្រូវនឹងថ្ងៃទី ៤មេសា ឆ្នាំ២០១៥ មានចន្ទគ្រាស (Eclipse of the Moon) មើលឃើញនៅអាស៊ីអូស្ដ្រាលីប៉ាស៊ីហ្វិក អាមេរិកាស ចាប់ផ្ដើមនៅម៉ោង ១៦ម៉០០នាទី បញ្ចប់នៅម៉ោង ២២ម៉០២នាទី ផ្ដើមជាអឌ្ឍគ្រាសពីម៉ោង ១៧ម៉១៦នាទី ដល់ម៉ោង ២០ម៉៤៦នាទី នៅកម្ពុជាមើលឃើញជាអឌ្ឍគ្រាស ចាប់ពីម៉ោង១៨ម៉៥៣ ដល់ម៉ោង ១៨ម៉០៩នាទី រហូតដល់ម៉ោង ១៨ម៉៥២នាទី។ ជាសារពើគ្រាសចាប់ពីម៉ោង ១៨ម៉៥៣ ដល់ម៉ោង ១៩ម៉០៨ រាហ៊ូថយពីមណ្ឌលព្រះចន្ទវិញ ហើយបញ្ចប់គ្រាសនៅម៉ោង ២២ម៉០២នាទី។
ព្រះអាទិត្យរះម៉ោង ៥ម៉៥៦ នាទី លិចម៉ោង ១៨ម៉១១ នាទី ព្រះចន្ទរះ ០៦ម៉០៧នាទី លិច ១៧ម៉៣៧នាទី
៣ - នៅថ្ងៃអាទិត្យ ១កើត ខែភទ្របទ ឆ្នាំមមែ សប្ដស័ក ចុល្លសករាជ ១៣៧៧ ត្រូវនឹងថ្ងៃទី១៣ ខែកញ្ញាឆ្នាំ២០១៥ មានសូរ្យគ្រាសជាអឌ្ឍគ្រាស (Patial Eclipse of the Sun) ចាប់ផ្ដើមពីម៉ោង ១១ម៉៤២ ដល់ម៉ោង ១៦ម៉០៧នាទី។ មើលឃើញនៅអាហ្វ្រិកខាងត្បូង អ៊ិនឌៀនខាងត្បូង និង អង់តាក់ទិក។ នៅប្រទេសកម្ពុជាយើងមើលមិនឃើញទេ។
ព្រះអាទិត្យរះម៉ោង ៥ម៉៥០ នាទី លិចម៉ោង ១៨ម៉០៣ នាទី ព្រះចន្ទរះ ០៥ម៉៣៨នាទី លិច ១៨ម៉០៤នាទី
៤ -នៅថ្ងៃ ១រោច ខែភទ្របទ ឆ្នាំមមែសប្ដស័ក ចុល្លសករាជ ១៣៣៧ ត្រូវ នឹងថ្ងៃទី២៨ ខែកញ្ញាឆ្នាំ ២០១៥ មានចន្ទគ្រាសជាសារពើគ្រាស (Total Eclipse of the Moon) ចាប់ផ្ដើមពីម៉ោង ៨ម៉០៧ ដល់ ១១ម៉២៨នាទី។ មើលឃើញជាសារពើគ្រាសចាប់ពីម៉ោង ០៩ម៉១០ នាទី ដល់ម៉ោង ១០ម៉២៤នាទី នៅប៉ាស៊ីហ្វិកខាងកើតអាមេរិកាសអឺរ៉ុប អាហ្វ្រិកា អាស៊ីខាងកើត។ កម្ពុជាមើលមិនឃើញទេ។